Ish-ministri i Mjedisit dhe njëherësh deputet i Durrësit, Lefter Koka, ka reaguar ashpër ndaj votimit të buxhetit të vitit 2018 të bashkisë Durrës. Ai është shprehur i dëshpëruar në lidhje me veprimin e këshilltarëve të LSI, të cilat bashkuan votat me PS duke kaluar buxhetin për vitin e ardhshëm.
Deputeti Koka tha se një votë pro këtij buxheti që i kanë dhënë këshilltarët e LSI, nuk është gjë tjetër, por vetëm një shërbim i keq ndaj këtij qyteti.Ai i përmend me emra këshilltarët e LSI, me bindjen se i kanë shërbyer keq qytetit bregdetar me votën pro buxhetit të hartuar nga Vangjush Dako.
“Këtë detyrë morale ndaj qytetarëve sot nuk e përmbushën 4 nga anëtarët e LSI në Këshillin Bashkiak: Adriana Hatellari, Iris Gruda, Sanije Doda, Skënder Korriku. Ju miqtë e mi i keni bërë sot një shërbim shumë të keq Durrësit dhe bashkëqytetarëve tuaj. Nuk ishte ky misioni ynë!” -theksoi Koka.
Këshilltarët e mësipërm të LSI-së kanë thyer vendimin e grupit, të cilët para mbledhjes kishin njoftuar kreun e Këshillit Bashkiak se nuk do të merrnin pjesë në seancën për votimin e buxhetit të vitit 2018. Grupi i LSI, votimin e këtij buxheti dhe vetë buxhetin në thelb, e kanë quajtur si një “buxhet fasadë”.
Levat ndikuese të Vangjush Dakos, kanë bërë që grupi i LSI-së të tundohet dhe të renditet në radhët e PS-së, për të siguruar kalimin e buxhetit për vitin e ardhshëm. Por i njëjti skenar ndodhi edhe në bashkinë e Tiranës, ku vota të siguruara nga LSI kaluan buxhetin edhe për kryeqytetin. Episode që politika dhe subjektet partiake i kanë përsëritur prej vitesh, kur bëhet fjalë për rrjedhje votash. TIRANA TODAY.
