Tottenham Hotspur ka arritur të mposht Liverpoolin me rezultat të thellë 4-1, në ndeshjen derbi të javës së nëntë në kampionatin anglez, Premier League. Skuadra e Mauricio Pochettios ka vazhduar serinë e fitoreve në kampionat duke arritur edhe fitoren e katërt radhazi, ndaj skuadrës së trajnerit Jurgen Klopp. Serinë e golave e hapi anglezi Harry Kane, i cili shënon vetëm pas katër minutash lojë një gol mjaft të bukur duke shmangur edhe portierin, asistimi ishte perfekt nga Kieran Tripper.
Vendasit gjeten edhe golin e dytë me anë të anësorit korean-jugor, Heung Min Son, i cili shënoi në minutën e 12-të pas asistit të Kane.
Liverpooli arriti të kthehet në lojë në minutën e 24-të të takimit pas një aksioni të bukur, ku Mohamed Salah shënoi për 2-1 i asistuar nga mesfushori angleze, Jordan Henderson.
Megjithatë, Tottenhami arriti të shënoj edhe një gol në minutat shtesë të pjesës së parë, ku shënoi me anë të Dele Allit, i cili dërgoi në dhomat e zhveshjes ekipin e tij me një siguri më të madhe.
Në pjesën e dytë, dominimi i Tottenham vazhdoi si në të parën pa e ulur ritmin dhe shënojnë golin e katërt me Kane, i cili shënoi pas gabimit të portierit Simon Mignolet.
Deri në fund të ndeshjes pati edhe disa raste nga të dyja skuadrat, por shifrat mbeten të pandryshuara dhe në fund vendasit iu gëzuan fitores me rezultat të thellë 4-1.
Pas kësaj fitore, Tottenham renditet në vendin e tretë me 20 pikë, po aq sa ka edhe Manchester Unitedi në vendin e dytë. Ndërsa Liverpooli renditet në vendin e nëntë me 13 pikë. Në ndeshjen e ardhshme, Tottenhami udhëton për tu ndeshur me Unitedin, ndërsa Liverpooli e pret në shtëpi Huddersfieldin.
https://www.youtube.com/watch?v=oe2QHZVQP9c&ab_channel=PavlikTV
