Deputeti Tom Doshi ka mbërritur sot në Prokurorinë e Përgjithshme, i shoqëruar nga avokati i tij, Vladimir Meçi.
Mësohet se deputeti është thirrur për t’i njoftuar akuzën e “deklarimit të rremë të pasurisë”. Konkretisht Doshi akuzohet se nuk ka deklaruar 3 automjete dhe disa llogari bankare.
Për shkak të ligjit të dekriminalizimit, gjyqtarja Rovena Gashi ka kërkuar që Doshit t’i ndalohet kandidimi në zgjedhje, ndërsa vetë deputeti i kontaktuar nga BalkanWeb, e cilëson të qëllimshme këtë lëvizje, e cila sipas tij, bëhet vetëm pak ditë para zgjedhjeve të 25 qershorit dhe për t’i prishur punë.
“Kjo është një lëvizje e qëllimshme që bëhet para zgjedhjeve. Jam i gatshëm të dëshmoj se çdo qindarkë të pasurisë sime e kam vënë në mënyrë të rregullt”, tha Doshi, i cili garon nën siglën e Partisë Social Demokrate të Skënder Gjinushit.
Hetimet për deputetin e Shkodrës nisën dy vite më parë, pas një kallëzimi të ILDKPI. Po ashtu mësohet se pas këtij vendimi Doshi do t’i drejtohet Gjykatës së Lartë.
