Kombëtarja shqiptare do të ketë edhe një fazë përgatitore që do të zhvillohet në muajin maj në Zvicër. Gjatë kësaj periudhe trajneri Christian Panucci do të ketë në dispozicion dy ndeshje miqësore, për të përgatitur ekipin që do të konkurrojë në Ligën e Kombeve dhe në eliminatoret e Europianit 2020.
Pas ndeshjes së zhvilluar në “Elabasan Arena” përballë Norvegjisë tekniku italian zbuloi kundërshtarin e parë në këto miqësore që do të jetë Ukraina e Andriy Shevchenkos, ndërsa po punohej për rivalin tjetër. Shqipëria tashmë duket drejt përpjekjeve të fundit për të zyrtarizuar edhe kundërshtarin e dytë, me të cilët do të përballët në miqësoret e muajit maj, e me të gjitha gjasat përballë do të jetë Kosova.
Tashmë mësohet se presidenti i FSHF-së, Armand Duka ka ngarkuar njerëzit përgjegjës në Federatë me mbylljen e përgatitjeve, në mënyrë që në Zvicër, më 29 maj, Shqipëria të zhvillojë edhe një ndeshje miqësore ndaj pjesës tjetër të kombit shqiptar, Kosovës.
