Pasojat e përmbytjeve duket se nuk kanë kaluar ende, madje po shkaktojnë një tjetër alarmim. Kështu, prurjet masive të lumenjve gjatë përmbytjeve po shkaktojnë ndotje masive të bregdetit Adriatik, në një zonë mjaftë të gjerë.
Në bregdetin e Durrësit, kryesisht në plazhin Currilat deri në Kepin e Rodonit, janë shpërndarë sasi të mëdha mbeturinash. Kjo situatë ka alarmuar edhe vendet fqinje, teksa një pjesë e ndotjeve është zhvendosur drejt bregdetit të Malit të Zi e Kroacisë.
Prurjet e jashtëzakonshme të lumit Ishëm dhe Erzen kanë nxjerrë në pah problematikën e madhe të mbetjeve urbane që në raste përmbytjesh shoqërohen me ndotje masive të bregdetit.
Siç duket edhe në foto, në bregdetin e Durrësit, për shkak të ndryshimit të erës ka dalë një sasi e madhe e mbetjeve që kanë sjellë këta lumenjtë nga përmbytjet, ndërkohë institucionet vendore po vlerësojnë situatën alarmante.
Nuk dihet nëse do të ketë ndonjë ndërhyrje për pastrimin e bregdetit, ndërkohë nuk ka struktura të specializuara për menaxhimin e situatave të tilla.
Kjo ndotje mund te cilësohet si alarm mjedisor, pasi në bregdet kanë dalë edhe shumë mbetje spitalore. Një rrezik të madh tashmë ka edhe për faunën detare pasi gjallesat detare janë të rrezikuara.
