Kryetari i Bashkisë së Tiranës, Erion Veliaj ka inspektuar fillimin e punimeve për ndërtimin e rrjetit të ri të ujësjellës-kanalizimeve në “Myslym Keta”.
Të pranishëm në inspektim bashkë me Veliajn ishin dhe deputetja e PS, Blerina Gjylameti dhe Drejtori i Përgjithshëm i UKT-së, Redi Molla.
Rrjeti i ri i ujësjellësit do t’i shërbejë një popullsie prej 10 mijë banorësh, e cila sipas ekspertëve mendohet të rritet në 18 mijë.
“Po bëjmë investime sikur zona të kishte 18 mijë banorë. Koha e ‘arnimeve’, ku mezi kapim rritjen demografike për çerdhe, kopshte e shkolla, në ujësjellës-kanalizime ka marrë fund. Sot, jo vetëm investojmë për të mbuluar kapacitetet që nevojiten, por investojmë edhe për kapacitete më të larta, për një Tiranë që do të vijojë të rritet. Me ritmet e rritjes aktuale është mëse e nevojshme që kapacitetet e investimeve të reja të parashikojnë edhe të ardhmen afatshkurtër e afatmesme të qytetit të Tiranës”, tha Veliaj.
Gjithashtu, kryetari i Bashkisë u bëri thirrje qytetarëve që të votojnë në mënyrë që të garantojnë vazhdimësinë e investimeve në kryeqytet.
“Ftoj të gjithë qytetarët e Tiranës të dalin masivisht në votime, nëse duan që të vazhdojmë me këtë ritëm. Nëse nuk duan që ta vazhdojmë këtë ritëm, nëse duan t’i ndërpresim punët, nëse duan t’i rikthehemi Tiranës së shkatërruar, mjafton të rrimë në shtëpi. Por, nëse duam që Tirana të ecë përpara dhe siç po përfundojmë këtë muaj sheshin “Skënderbej”, Bulevardin e Ri, Parkun Olimpik dhe gjithë investimet e tjera të Tiranës, si Pazari i ri apo këndi i lojërave te Liqeni, na duhet që çdo qytetar të dalë e të thotë fjalën e vet, nëse do që Shqipëria të shkojë përpara”, theksoi Veliaj.
