Tirana merr një fitore mjaft të rëndësishme në një moment delikat, pas humbjes në derbi dhe polemikave të mëdha në klub. Bardheblutë kanë mposhtur Kastriotin në transfertë me rezultatin 2-3. Fitorja ishte shumë e vështirë, aq më tepër që krutanë kaluan të parët në avantazh me Bardhin, i cili përfundoi nga gabimi i Likës.
Tirana barazoi me fat, kur gjuajtja e Grecës u devijua nga Stjepoviç. Më pas ishte Bllazhevski që shënoi dy herë për skuadrën e Ze Marias, i cili kishte bërë shumë ndryshime në këtë ndeshje. Krutanët u futën në lojë me golin e Markut dhe iu afruan barazimit, por nuk ia dolën dhe pësuan humbjen e radhës.
Laçi mbetet skuadra e vetme në Superiore, pa asnjë humbje, deri më tani, në këtë kampionat. Me 13 pikë, pas fitores minimale 1-0 ditën e sotme ndaj Flamurtarit, në kuadrin e javës së 7-të, skuadra e Artan Mergjyshit i bashkohet kreut, me 13 pikë. Vlen të përmendet fusha e stadiumit kurbinas, në kushte aspak të mira, teksa ngjyra e gjelbër thuajse nuk ekziston më në të. Tapetit duket se i ka mbaruar “afati i skadencës”, ndaj nga e premtja nis mbjellja e barit të ri në të dhe përkujdesje të tjera specifike.
Luftëtari ka arritur të marrë një fitore mjaft të rëndësishme përballë Kamzës në Gjirokastër, me rezultatin e ngushtë 1-0. Djemtë e Mezanit kanë pasur 3 pikë më pak sesa Kamza, e ndërsa me fitoren e sotme barazojnë Kamzën në kuotën e 6 pikëve. Një fitore e merituar pas një dominimi të dukshëm të vendasve, pasi epërsia e kryeqytetasve në pikë nuk ka qenë e dukshme në fushën e blertë.
