Euforia e trofeut të parë sezonal tashmë është arkivuar. Nis Kategoria e Parë dhe Tiranës i duhet të përballet me një realitet të ri, për herë të parë në histori e nis sezonin në një kategori inferiore, e megjithatë trajneri Ze Maria duket se i ka idetë e qarta para sfidës me Ilirinë. “Kategoria e Parë është një kampionat që do të na çojë në Kategorinë Superiore, ky është objektivi ynë, ndaj e nisim me 100 në orë, pasi ky është ritmi ynë, dhe kjo rruga që duhet të bëjmë”.
Një ide se çfarë e pret në Kategorinë e Parë trajneri i bardhebluve e ka krijuar me sfidën ndaj Besës në Kupë, ashtu siç e ka të qartë se të gjithë skuadrat, sidomos ato të Kategorisë së parë do të kërkojnë skalpin e Tiranës , një trofe për të cilin ju jepet mundësia ndoshta një herë në jetë.
“Të gjitha skuadrat do të duan të mundin Tiranën, si në të parën dhe në Superiore, Nuk duhet tu japim mundësi dhe të relaksohemi, duhet të jemi të bindur te vlerat tona dhe të mos u japim hapësira , pasi cdo skuadër do të bëjë gjithcka kundër kësaj Tirane, pasi është skuadra më e madhe e këtij kampionati”.
Trajneri vë objektiv për çdo ndeshje në shtëpi trepikëshin, ndërsa për transfertat është i vetëdijshëm se një problem përbën dhe terreni.
“Nuk do të jetë e lehtë sidomos kur luajmë jashtë pasi ndaj Besës e pamë që struktura nuk është optimale, bari i lartë dukej si fushat në Brazil 30-40 vjet më parë dhe na ngadalësoi. Duhet ta bëjmë fatin tonë sidomos këtu ku nuk duhet të marrim asnjëherë më pak se 3 pikë, duke patur respekt për kundërshtarët por pa harruar që jemi Tirana”.
Por si do ta gjejnë lojtarë të mësuar në Superiore apo blerjet e reja motivimin për të dhënë maksimumin në një Kategori Inferiore? Ze Maria e ka të thjeshtë, transmeton Supersport.
“Motivimi më i madh është kur ti vesh fanellën e Tiranës, pavarësisht nga Kategoria ku luan apo kundërshtari që përballesh, ti mbron këto ngjyra dhe ky është motivimi më i madh, luan në Kategorinë Superiore apo atë inferiore”. Në fund objektivi për ndeshjen e radhës me Ilirinë, por jo vetëm.
” Nëse luajmë mirë dhe fitojmë tre pikët do ishte perfekte. ne për këtë përgatitemi, për të ndryshuar pak futbollin nëse më lejoni ta them duke lënë mënjanë modestinë, Për ta ndryshuar pak me atë cfarë kemi parë, të luajmë gjithmonë me shumë zotërim pasi është e vetmja mënyrë për të krijjuar hapësira dhe nëse ja dalim do të ishte shumë bukur”.
