Në datat 29 dhe 30 mars, në skenën e Teatrit Kombëtar të Operës dhe Baletit pritet të zhvillohet festivali ndërkombëtar i vokalit operistik “Marie Kraja”.
Publiku i teatrit do të mund të shijojë dy mbrëmje me muzikë të përzgjedhur nga repertori botëror i kompozitorëve Puccini, Gounod, Bellini, Mozart, Bizet, Verdi, Rossini, etj, por edhe këngë lirike mjaft të njohura.
Në të dyja netët e festivalit, nuk do të mungojë edhe trupa e baletit, ku këtë vit për herë të parë ngjiten në skenë shumë kërcimtarë të rinj. Drejtoresha e TKOBAP Zana Çela, e cila është themeluese e këtij festivali por dhe në juri, ka deklaruar se qëllimi janë talentet e reja.
“Tirana do të flasë me gjuhën e muzikës klasike, me gjuhën e operës. Qëllimi është të zbulojmë talentet e reja”, tha mes të tjerave Çela.
Plot 15 konkurrentë, nga katër kontinente do të garojnë për të marrë çmimin që mban emrin e një prej themelueseve së operës shqiptare “Marie Kraja”.
Ata do të gjykohen nga një juri ndërkombëtare, e përbërë prej drejtues të operave të mëdha evropiane. Konkurrentët e edicionit të 18-të janë nga Ukraina, Shqipëria, Koreja e Jugut, Sllovenia, Afrika Jugore, Kina, Zvicra, Serbia, Gjermania, etj.
