Barazimi pa gola me Vllazninë ka qenë fatal për bardheblutë, të cilët do të luajnë sezonin e ardhshëm në një kategori inferiore. Në këtë mënyrë, Tirana i është bashkuar Korabit, të cilin do ta ketë bashkudhëtar në sezonin 2017-2018 në Kategorinë e parë.
Pjesa e parë ishte e gjitha nën diktatin e Vllaznisë që zotëroi lojën duke krijuar disa raste për shënim. Ndërsa 45 minutat e dyta ishte Tirana më kërkuese, ku me kalimin e minutave tentuan të provojnë më shumë drejt portës së Vllaznisë, por pa mundur të shënonin golin e mbijetesës.
Në fundin e ndeshjes nuk mungoi dhe tensioni mes lojtarëve, ku arbitri ndëshkoi me të kuqe nga Pjeshkën e Vllaznisë dhe Cisse për Tiranën. Bardhebutë renditen të 9-t me 38 pikë, 1 më pak se Vllaznia, Laçi dhe Flamurtari, duke rënë nga Superliga.
Ndeshjet e tjera
Laçi e Flamurtari bënë detyrën duke fituar në ndeshjen e fundit. Laçi siguroi mbijetesën me fitoren 2-1 ndaj Teutës, ndërsa Flamurtari fitoi pastër 0-3 ndaj Korabit. Në dy ndeshjet e tjera që kishin vlerë vetëm statistikore. Skënderbeu-Partizani u mbyll në barazim 2-2, ndërsa Luftëtari mundi kampionët e Kukësit, duke i shkaktuar humbjen e parë në këtë kampionat, pikërisht në javën e fundit, atëherë kur të gjitha synimet i kishte arritur.
