Sektori i ndërtimit në Shqipëri do të vijojë të jetë në rritje të vazhdueshme, ndërsa kjo strategji është e mbështetur nga projekti “One Billion”, i cili do të tregohet si shfrenues i projekteve të mëdha.Sektori rezidencial do të filloj rritjen e shpejtë, ndërsa kjo vërehet edhe në përditshmëri, sidomos në kryeqytet aty ku numri i popullsisë po vjen gjithnjë e në rritje.
Strategjia e qeverisë për paketën 1 miliard dollar është shigjetuar nga ana e opozitës me faktin se këto nuk janë para investimi, por janë para që vijnë nga trafiku i drogës dhe korrupsionit.Këto pretendime janë hedhur poshtë nga ana e mazhorancës, ndërsa e cilëson këtë projekt si një strategji në përmirësimi e jetës së qytetarëve shqiptarë.
Investimet e huaja në Shqipëri, kjo e bazuar edhe në të dhënat e INSTAT, ka pësuar rënie dhe një ndër faktorët ndikues është edhe projekti i lançuar nga qeveria Rama i njohur ndryshe si “One Billion”
Sektori i ndërtimit do të vijojë rritjen edhe më 2018 me ritme të njëjta si të këtij viti dhe përshpejtim në sektorin e banesave, teksa efektet e ngadalësimit të punimeve nga projekti TAP dhe HEC-et mbi lumin Devoll pritet të zëvendësohen në një masë të konsiderueshme nga angazhimi i projektit “One Billion” që parashikon nisjen e punimeve në 6 akse të mëdha rrugore. Gjithashtu sektori i banesave rezidenciale dhe për qëllime biznesi do të vijojë të rritet me ritme të shpejta në qytetet kryesore dhe sidomos në Tiranë. Teksa ndërtuesit presin që bumi i ndërtimeve të reja të vijojë më tej, duke lajmëruar edhe rritje të mëtejshme të çmimeve për shkak të kostove që ka krijuar taksa e lartë e infrastrukturës.
Ndërtimi në infrastrukturë, ja nga do të nxitet më 2018
Arben Dervishi, nga Shoqata e Ndërtuesve, rendit disa arsye se pse sektori do të vijojë rritjen.
Së pari, angazhimi i projektit “One Billion” me investime në rrugë, pritet të rigjallërojë sektorin e ndërtimit dhe zinxhirin që lidhet me të. Avancimi i punimeve në Rrugën e Arbrit, nga Gjoka Konstruksion, e cila do të “eksperimentojë” e para investimin nga paketa “One Billion”, zhvillimi i tenderëve për dy lotet e shkollave në Tiranë po nga kjo paketë dhe me shumë mundësi avancimi i punimeve në By-passet e Fierit dhe Vlorës, si dhe nisja e punimeve në aksin Rrogozhinë-Thumanë janë disa nga projektet e reja që do të nxisin rritjen në sektorin e ndërtimit, – shpjegoi Dervishi.
“Së dyti, fondet publike ndaj investimeve në bujqësi, ujësjellës dhe në objekte të tjera të infrastrukturës janë më të larta këtë vit. Dervishi thotë se, në vitin 2017 pati një ngërç në realizimin e prokurimeve publike, për shkak të bllokimit që erdhi si rezultat i formimit të qeverisë teknike. Më 2018, këto pengesa do të neutralizohen dhe ato objekte që nuk kanë mundur të avancojnë në punime vitin e kaluar, këtë vit do të realizohen dhe kjo do të shtyjë më tej ecurinë pozitive të sektorit”-shkruan Monitor.
Së treti, investimet në hotelet me 5 yje do të ndikojnë pozitivisht zhvillimet në sektorin e ndërtimit. Incentivat fiskale që dha qeveria nëpërmjet Paketës Fiskale 2018 kanë nxitur një sërë projektesh në hotelet me 4 dhe 5 yje që do të ndërtohen kryesisht në bregdet dhe në Tiranë. Arben Dervishi thotë se, ndërtimi i hoteleve është një mundësi tjetër e re që garanton zhvillime pozitive për ndërtimin, por në afatgjatë do të ndikojë pozitivisht edhe sektorin e turizmit.
Sipas tij, ndërtimi i një aeroporti të ri në Vlorë do të nxiste më tej ndërtimet dhe flukset e turistëve në Jug të vendit.
Banesat, bumi në Tiranë do të vijojë edhe më 2018
Hajredin Fratari, një nga ndërtuesit me përvojë të sektorit të banesave në Tiranë, tha se viti 2017 u mbyll me një rritje të shitjeve me rreth 10%, teksa pohoi se sektori do të vijojë të zgjerohet me të njëjtat ritme si në shitje edhe në volume gjatë 2018-s.
Fratari tha se kërkesa për të blerë apartamente është e sigurt edhe për vitin 2018, teksa shfaqi dyshime për qendrat e biznesit dhe ato tregtare. Nuk ka shumë kërkesa për zyra dhe apartamente të luksit, kundrejt ofertës së lartë që do të sjellin kullat që pritet të nisin më 2018.
Të njëjtin pohim dha edhe Arben Dervishi nga Shoqata e Ndërtuesve, i cili shfaqi rezerva për kërkesën për objektet e larta. Ai tha se këto objekte kanë kosto të larta menaxhimi dhe puna në kate të larta nuk është shumë komode. Bizneset dhe individët me të ardhura të larta nuk do të preferonin zyra ose apartamente në lartësi, pasi nuk janë aspak komode dhe kanë kosto menaxhimi dhe mirëmbajtje.
Dervishi tha se kërkesa për banesa në Tiranë do të jetë e qëndrueshme, për periferinë për shkak se Tirana zgjerohet të paktën me 20 mijë banorë të rinj në vit.
