Tirana ka fituar pa shumë vështirësi ndeshjen e vlefshme për javën e 4-të, përballë Shkumbinit. Gjashtë golat e Dokës, Ngoo, Hoxhallarit, Sentamu, Dajës dhe Karabecit me penallti kanë bërë që bardh e blutë të marrin fitoren e katërt radhazi në grupin e jugut në Kategorinë e Parë, dhe të mbeten të vetëm në krye të renditjes, me pikë të plota.
Pas fitores tenistike ndaj Shkumbinit, trajneri i Tiranës, Ze Maria, u shpreh i kënaqur me ekipin, dhe deklaroi se pret që të vazhdojnë këtë formë me të cilën kanë nisur Kategorinë e Parë.
Fitorja ishte shumë e thjeshtë përballë Shkumbinit. A ishte kjo një shëtitje në Peqin?
“Nuk ishte aspak shëtitje. Në fillim nisëm pak me ngadalë. Duhet të jemi gjithmonë 100%.”
Ndoshta lojtarët humbin përqendrimin pas fitoreve të thjeshta. Po prisni Vllazninë në kupë që të matni forcat?
“Nuk mendoj se do të humbin përqendrimin, as unë nuk e mendoj këtë. Duhet të stërvitemi të jemi gjithmonë në formë, edhe për kupën.”
13 gola të shënuar, asnjë i pësuar.
“Ekipi është në gjendje të mirë. Kemi stërvitur mirë të gjitha repartet, dhe funksionojnë. Sentamu dhe Ngoo shënojnë. Edhe Lika është në formë të mirë dhe bën pritje çdo javë.”
