Thënies së kryeministrit të Shqipërisë, Edi Ramës, se Shqipëria nuk duhet të këtë një makinë me dy timonë, kur bëhet fjalë për bashkëqeverisje me LSI-në apo PD-në, i është përgjigjur duke e ironizuar zv/kryetarja e LSI-së Monika Kryemadhi.
Kryemadhi i ka sugjeruar Ramës që të mësojë ti japë makinës e të marrë Leje Drejtimi para se të flasë për timonin.
“Dua ti sugjeroja z. Rama të marrë lejen e drejtimit për ti dhënë makinës”,tha ajo.
Po ashtu, lidhur me zgjedhjet dhe koalicionin e përfolur PS-PD-së, ajo u shpreh se këtë e vendosin shqiptarët në 25 qershor.
E ftuar në rubrikën “Opinion” në News 24, lidhur me sondazhet e bëra publike ditën e djeshme nga IPR Marketing, Kryemadhi tha se LSI nuk paguan haraçe për sondazhe të tilla.
“Më vjen për të qeshur por fillimi i mbarë nuk janë sondazhet, por puna që ka bërë LSI me qytetarët. Sondazhet nuk e kanë treguar asnjëherë fituese. Sondazhet periferike janë qesharake dhe nuk janë absolutisht shqetësuese. LSI nuk ka për të paguar asnjëherë haraçe për sondazhe të tilla që jo vetëm kërkojnë të manipulojnë opinionin publik por edhe të heqin vëmendjen nga hallet e problemet e shqiptarëve”, tha ajo.
Ndërkaq, në fund të kësaj interviste Kryemadhi është shprehur se një nga mangësitë që ka Shqipëria është politika pasi gjithçka që i ka dhënë zoti është e përkryer.
