Këshilltarja e Ramush Haradinajt, Meliza Haradinaj, ka bërë një postim në rrjetin social Facebook para se Haradinaj të niset për në Hagë. Ndër të tjera, fjalia që ka tërhequr vëmendjen e mbarë opinionit publik dhe aktorëve politikë shqiptarë është: “Të pashë kur t’i ngulën ‘thikat në shpinë’ ata prej të cilëve nuk e prisje, por nuk t’u tremb syri as goja për t’i përballë me të vërtetën”.
Po për kë vallë e ka pasur fjalën konkretisht këshilltarja e Haradinaj?
Ja postimi i saj i plotë:
“Kryeministër,
Të pashë teksa u acarove kur ta përmendën për herë të parë në zyrën tënde ndarjen e Kosovës; Të pashë teksa ia the troç, tejskajshmërisht i irrituar, atij që për herë të parë ta përmendi ndarjen dhe shkëmbimin e territoreve – që nuk është më i mirëseardhur në zyrën tënde;
T’a njoha dhimbjen kur ishe i vetëm në luftën për mosdorëzimin e sovranitetit të Kosovës te Serbia; Isha aty kur iu the të gjithëve që për Ushtrinë e Kosovës nuk do të vendoset në tavolinën dialoguese me Serbinë, as për Trepçën, as për tregun e Kosovës; Të pashë kur t’i ngulën ‘thikat në shpinë’ ata prej të cilëve nuk e prisje, por nuk t’u tremb syri as goja për t’i përballë me të vërtetën.
Çfarëdo të jetë epilogu i shkuarjes sate të sotme në Hagë, prapa na ke, si ushtarë politikë, luftëtarë të paqes, në rresht, duke shtyrë përpara kauzën tënde për t’a bërë Kosovën ashtu siç na e lanë amanet të parët tanë. Për Kosovën shtet – të pandashëm, unik, që qëndron e fortë vertikalisht në këmbët e saj.
Na e the sot, që vetëm ata që qëndrojnë stoik për shtet e popull, do të dalin fitues! Kosova jonë e ka fitoren në derë! Faleminderit dhe mirupafshim së shpejti në Kosovë, Kryeministër”.
