Kira Peter-Hansen është vetëm 21 vjeçe, por ajo sapo është zgjedhur si deputetja më e re e Parlamentit Europian. Në intervistën dhënë për BBC, 21-vjeçarja nga Danimarka u shpreh se ishte pak e ndrojtur prej moshës së saj. Por, njëkohësisht shumë e emocionuar për punën.
“Edhe praktikantët janë të paktën 2 vjet më të mëdhenj se unë. Nuk jam e sigurt nëse njerëzit do të më shohin thjesht si një vajzë të vogël, e cila nuk ka asgjë për të bërë këtu. Apo do të kenë vërtetë respekt për mua edhe nga partitë e tjera. Mendoj se tanimë unë kam një përgjegjësi shumë të madhe.
Sepse duhet të përfaqësoj të rinjtë dhe po ashtu ata të rinj të cilët janë të përfshirë në politikë. Për t’i treguar që politikanët e rinj janë po aq të mirë sa ata që janë më të vjetër.”
Hensen u shpreh se qëllimi i saj primar është të nxisë më shumë reforma në lidhje me ndryshimet klimatike.
“Nëse ke mundësinë për të ndryshuar gjëra, atëherë duhet ta bësh. Politika është shumë e vështirë, ti mund të bësh vetëm hapa të vegjël dhe të presësh për një ndryshim të madh. Unë shpresoj që Parlamenti Europian do të investojë më shumë në ndryshimet klimatike dhe kërkime për ta zvogëluar pasojat.”
Hensen ndër të tjera tha se për të marr pjesë në sesionet parlamentare, nuk do të udhëtojë me avion, por me tren.
“Të lëvizësh 3,000 njerëz nga Brukseli në Strasburg çdo muaj nuk është aspak miqësore me mjedisin. Ndaj unë jam duke e menduar si të shmang këtë gjë, duke udhëtuar me tren.”
Rekordin për moshën më të vogël si deputete në Parlamentin Europian e mbante gjermania Ilka Schroeder, e cila ishte 21 vjeç e gjysmë, kur u zgjodh në 1999. Por, Hensen është edhe më e re se Schroeder./ Burimi: BBC, Përshtati: TIRANA TODAY
