Gazetari i kronikës Flamur Vezaj, në statusin e radhës në Facebook ka hedhur dritë mbi dosjen e shumëdiskutuar 339. Sipas gazetarit, në këtë dosje ka edhe përgjime ku është përfshirë kryeministri Rama.
Vezaj, këtë informacion që e ka ndarë me ndjekësit, citon se është një burim nga Krimet e Rënda dhe se çdo gjë është lehtësisht e vërtetueshme.
Në dosjen në fjalë të cilën e kanë marrë dy prokurorët Vladimir Mara dhe Dritan Prenci, rezultojnë se janë interceptuar biseda dhe mesazhe të kryeministrit Rama me ish-Drejtorin e Përgjithshëm të Burgjeve, Arben Çuko.
Është ende herët për të treguar përmbajtjen e këtyre bisedave, pasi hetuesit po i verifikojnë. Skandali thellohet edhe më tej, pasi në dosje ka edhe biseda të ministrave, kreut të grupit parlamentar të PS-së, Taulant Balla, e shumë deputetëve të tjerë.
Reagimi i Vezajt:
“KM Rama ne pergjimet e dosjes “VOLVO 4”
Në rrjetin e përgjimeve në dosjen “339” ose operacionin “VOLVO 4” ka rënë edhe Kryeministrit Edi Rama! Ky lajm konfirmohet nga burimet kofidenciale pranë Prokurorisë së Krimeve të Rënda! Ne dosjen me nr.339 që po hetojnë dy prokurorët Vladimir Mara dhe Dritan Prenci rezultojnë se janë interceptuar biseda dhe mesazhe të Kryeministrit Edi Rama me ish-drejtorin e përgjithshëm të burgjeve Arben Çuko!
Keto mesazhe dhe biseda ndodhen në dosje të veçuara! Nuk dihet se çfarë përmbajtje kanë pasi hetuesit ndodhen në fazën e verifikimit të tyre, nëse përbëjnë interes për dosjen ose jo!
Burimet thonë se janë interceptuar edhe mesazhet e ish-deputetit Arben Ndoka me KM Rama dhe deputetë të ndryshëm të shumicës në vend!
Por jo vetem kaq, në dosje ka edhe biseda të ministrave, kreut të grupit parlamentar të PS-së T.Balla e shumë deputetëve të tjerë me dy ish-deputetët. Si dhe biseda të shumta të “supermenit” të bisedave telefonike Vangjush Dako me pjesetarët e grupit të trafikut të drogës!
Ftoj dy prokurorët Mara e Prençi që të reagojnë zyrtarisht me precedentin e njoftimit “Prela” se sa të verteta janë këto informacione të siguruara nga burimet kofidenciale!
#Vazhdoni_transparencen”, përfundon reagimin gazetari Flamur Vezaj.
