Lushnja i thyen shpresat e kthesës Partizanit, në ndeshjen e zhvilluar në ‘Selman Stermasi’ e cila u mbyll në barazim, ‘të kuqtë’ dështojnë edhe me ekipin e porsa ngritur në Superiore. Është mbyllur në barazim pa gola ndeshja e fundit e javës së katërt mes Partizanit dhe Lushnjës, për të rikonfirmuar kështu pozitat fundore të të dy skuadrave, e mbi të gjitha për të ndezur seriozisht sirenat e alarmit në kampin e kuq, për një krizë të thellë golash dhe pikësh. Pas katër javësh kampionat, skuadra e Partizanit renditet në vend të fundit të klasifikimit me vetëm 2 pikë, zero gola të shënuar dhe katër të pësuar, e parakaluar edhe nga ekipi i Lushnjës, që renditet në vend të nëntë, me po aq pikë sa kryeqytetasit, por një gol më shumë të shënuar.
Me një pjesë të parë shumë të vakët, kur me vështirësi mund të kërkohen rastet e krijuara nga të kuqtë, presioni dhe superioriteti në administrimin e topit nuk kanë asnjë vlerë për Partizanin që edhe në pjesën e dytë, në dy rastet më të mira vetëm sa i është afruar golit me anë të Sukaj që ka goditur shtyllën dhe Atanda që është ndalur nga traversa. Nga ana tjetër, skuadra e Lushnjës ka marrë një barazim të vlefshëm, qoftë edhe për moral, në një transfertë të vështirë, të paktën sikurse parashikohej teorikisht dhe në letër.
Partizani – Lushnja 0-0
Partizani: Hoxha, Progni, Krasniqi, Atanda, Kotobelli, La Camera, Batha, Trashi, Adorian, Djidjiëa, Bardhi.
Trajner: Mark Iuliano
Lushnja: Spaho, Ruço, Xhafa, Marku, Mone, Branica, Gava, Papa, Canka, Pepa, Sefa.
Trajner: Artan Bano
Gjyqtar: Ardian Beqiri
