Prestigjiozja “The Sun” ka ngritur një hipotezë që ngre në qiell zemrat e shqiptarëve, kryesuesja e grupit ku bën pjesë Shqipëria rrezikon të përjashtohet nga botërori Rusi 2018. Kjo pas referendumit që është programuar të ndodhë nesër dhe ti japë pavarësinë Katalonjës. Nga ky skenarë do të ishte kombëtarja jonë që do të përfitonte një biletë për në Rusi vitin e ardhshëm.
Nesër në Katalonjë mbahet referendumi për pavarësinë e këtij rajoni dhe nëse kjo votohet, pritet të ketë edhe shumë ndikim në futboll. Javier Tebas, presidenti i “La Liga-s”, kampionatit spanjoll, ka deklaruar se në rast se Katalonjë del e mëvetshme, atëherë instuticioni që ai drejton do të marrë vendimin për të përjashtuar Barcelonën nga kampionati. Jo vetëm kaq, por së bashku me skuadrën e madhe katalanase, të njëjtin fat do të kishin edhe Girona e Espanyol.
Mirëpo, kjo sipas “The Sun”, mund të sjellë “hakmarrjen” e FIFA-s duke dënuar Spanjën me pretekstin se ka thyer rregulloren që ndalon ndërhyrjen e politikës në futboll, gjithmonë nëse Barça përjashtohet nga “La Liga”.
Raportime nga Spanja thonë se megjithëse zhurmës së madhe kjo ka pak gjasa të ndodhë.
Komuniteti i futbollit spanjoll beson se shkëputja është një perspektivë e largët, duke pasur parasysh se Madridi ka shpallur votimin e së dielës si jokushtetuese, por kjo nuk e ka ndalur krizën politike katalanase të ekspozojë ndarjet mes tifozëve dhe disa zyrtarëve.
Gjithsesi nëse e pamundura bëhet e mundur, atëherë do të hapeshin skenarë mjaft interesantë për grupin tonë. Me përjashtimin e Spanjës përfiton direk Shqipëria e cila mban momentalisht vendin e 3-të dhe me gjasë kështu do jetë deri në fund.
Në këto rrethana, Italia do kualifikohej direkt për në fazën finale të Botërorit, ndërsa kuqezinjtë do të duhej të kalonin një kundërshtar në fazën “play-off”. Të gjitha këto kanë pak shanse të ndodhin, po nëse Shqipëria do të ishte me kaq fat, atëherë na pret një verë e jashtëzakonshme. /Tirana Today/
