Presidenti i Kosovës, Hasnim Thaçi, ka hedhur akuza të ashpra dhe të guximshne ndaj BE-së dhe veçanërisht ndaj komisionerit për Zgjerim, Johannes Hahn për mosmbështetje të vendeve të Ballkanit Perëndimor në proceset integruese.
Thaçi e lëshoi këtë deklaratë gjatë një interviste për Agjencinë Austriake të Lajmeve (APA), në Vjenë, ku ishte në kuadër të një vizite zyrtare.
Në këtë intervistë kreu i shtetit të Kosovës kritikon ashpër BE-në për mungesë të vizionit dhe guxim.
Ai ka paralajmëruar se kjo mungesë e lidershipit në BE do të shfrytëzohet nga Rusia për destabilizimin e shteteve të Ballkanit dhe ka kërkuar nga BE që sa më shpejt të ndryshojë qasjen ndaj shteteve të Ballkanit. Sipas APA-s, ai ka qenë shumë i ashpër me kritikat ndaj komisionerit për Zgjerim, Johannes Hahn.
“Vonesa e Bashkimit Evropian nuk mund të justifikohet. Federica Mogherini të paktën përpiqet të ruajë të njëjtën dinamikë në Ballkanin Perëndimor, derisa komisoneri Hahn për fat të keq nuk është fare prezent në Evropën Juglindore”, ka shtuar ai.
Sipas tij, komisioneri Hahn është përkujdesur vetëm për Serbinë dhe për asnjë vend tjetër në Ballkanin Perëndimor. Ai ka kërkuar një angazhim më të shtuar të BE-së në Ballkan, për të ulur ndikimin rus, i cili është duke u rritur.
Në këtë intervistë për APA, Thaçi ka theksuar se BE-ja nuk duhet ta shohë rajonin vetëm si një çështje teknike, por edhe në mënyrë strategjike.
“BE-ja nuk duhet ta shohë Ballkanin nga perspektiva teknoktrate, bazuar në kapituj të katalogëve të kritereve. Nëse BE vepron në mënyrë më strategjike, më aktive, atëherë do të mbyllë hapësirën e krijuar për destabilizimin e rajonit nga Rusia”, ka thënë ai.
Thaçi ka kritikuar po ashtu BE-në për kriterin e vendosur për procesin e liberalizimit të vizave. Ai ka folur edhe për zgjedhjet e parakohshme që do të mbahen më 11 qershor. APA shkruan se presidenti Thaçi, i cili është mbipartiak ka refuzuar të komentojë mbi politikat partiake.
Megjithatë, ai ka disa pritshmëri për qeverinë re të Kosovës, që do të dalë nga zgjedhjet. “Duhet të përfundojë demarkacioni, asociacioni i komunave me shumicë serbe, liberalizimi i vizave, normalizimi i marrëdhënieve me Serbinë etj”, ka thënë Thaçi për APA.
