Presidenti i Kosovës, Hashim Thaçi ka zhvilluar një takim me homologune tij serb në Davos, ku po marrin pjesë në Forumin Ekonomik Botëror.
Takimi vjen pas ngjarjes së bujshme që ndodhi në Mitrovicë, ku u vra politikani serb, Oliver Ivanoviç gjë që pasoi me ndërprerjen e dialogut mes Kosovës dhe Serbisë në Bruksel.
Lajmin për takimin e ka dhënë vetë presidenti Thaçi, nëpërmjet një postimi në Facebook, ku shkruan se biseda me presidentin serb është fokusuar tek vazhdimi i dialogut për normalizimin e marrëdhënieve ndërmjet Kosovës e Serbisë dhe domosdoshmërinë e arritjes së një marrëveshjeje historike ndërmjet dy shteteve.
Më herët, presidenti serb Aleksandër Vuçiç tha se Bashkimi Evropian nuk do të pranojë anëtarësimin e Serbisë pa zgjidhur më parë çështjet e kufijve.
Ai tha se në Llapnasellë në Kosovë, ku ishte fundjavën e kaluar, një grua serbe me të cilën foli, i tha atij, “Bir, thjesht mos nënshkruaj gjë”, dhe shtoi se edhe babai i tij i sugjeron të njëjtën gjë.
“Çfarë mendoni ju, a duhet dikush që të marrë vendime në këtë vend? E kemi kaluar këtë situatë ku nuk ka pasur nënshkrime dhe vendime. Dhe ju i dini të gjitha gjërat që kemi fituar dhe paqen ‘e blerë’ me marrëveshjen e Brukselit”, tha Vuçiç, duke shtuar se duhet të flasin për të ardhmen, se cfarë do të bëjnë, duke theksuar se “nuk përfitojnë asgjë nga konflikti me shqiptarët”.
“Ata nuk janë më të fortë se ne, por ne nuk duhet të jemi më të fortë; duhet të jemi më të pasur, më të suksesshëm, të nxitojmë dhe të arrijmë ata që janë përpara nesh, të kemi më shumë investime të huaja dhe vendase”, tha Vuçiç.
Statusi i plotë:
Në kuadër të Forumit Ekonomik Botëror në Davos, sot zhvillova një takim bilateral me Presidentin e Serbisë, Aleksandër Vuçic.
Ne biseduam për vazhdimin e dialogut për normalizimin e marrëdhënieve ndërmjet Kosovës e Serbisë dhe domosdoshmërinë e arritjes së një marrëveshjeje historike ndërmjet dy shteteve.
Kjo është e vetmja mënyrë për ruajtjen e paqes dhe hapjen e perspektivës evropiane për gjithë Ballkanin Perëndimor.
