Bujar Leskaj rikthehet në krye të Kontrollit të Lartë të Shtetit. Ai do të qëndrojë në këtë post deri në momentin kur të zëvendësohet nga një drejtues i ri.
Rikthimi i Leskajt vjen pasi Lindita Milo ka hequr dorë nga ushtrimi i kompetencave të kryetarit për arsye personale.
“Pas kërkesës për tërheqje nga kompetencat e deleguara të zv. Kryetares, znj. Lindita Milo për arsye personale, dt. 21.05.2019, nr. 347, dhe garantimit te vijueshmërisë normale të punës;
Në kushtet e zgjatjes në kohë të nominimit dhe përzgjedhjes së Kryetarit të ri të KLSH-së, sipas përcaktimeve të Ligjit 154/2014.
VENDOSA:
- Shfuqizimin e kompetencave të deleguara me vendimin e Kryetarit nr. 244, datë 12.12.2018 zv/Kryetarit të KLSH-së znj. Lindita Lati (Milo).
- Ky vendim do i përcillet Presidentit të Republikës, Kryetarit të Kuvendit, Kryetarit të opozitës.
Vendimi hyn në fuqi pas botimit në fletoren zyrtare”, thuhet në vendimin e firmosur nga Leskaj.
Mandati i Leskajt përfundoi në janar të këtij viti, e kompetencat e tij i kaluan zëvendëses, Lindita Lati Milo.
Ndërkohë dy kandidaturat e presidentit Ilir Meta për Vitore Tushën dhe Bahri Shaqirin u rrëzuan nga mazhoranca me pretendimet se u mungonte eksperienca në fushën financiare.
