Lumi i Vjosës në zonën e Përmetit tregon se pas disa orësh zonat fushore në rrjedhën e këtij lumi, kryesisht në Fier dhe Vlorë do të përmbyten për shkak të vërshimit të ujit.
Ushtria është e gjitha në terren dhe po largon banorët dhe bagëtitë në këto zonna që mund të rrezikojnë jo pak nga dalja nga shtrati i lumit Vjosë.
Parashikimet përgjatë orëve të natës nuk janë aspak optimiste, pasi pritet që prurjet në lumin Vjosa të shtohen më intensitet të lartë. Ndërkohë që Shtabi i Emergjencave në Qarkun e Fierit raporton se ka evakuuar 1500 banorë në fshatrat Ferras, Çerven e Koshisht, ndërkohë që deri më tani, 180 hektarë tokë bujqësore është nën pushtetin e ujit-shkruan Top Channel. Gjendja e rënduar raportohet edhe në qarkun e Vlorës , kryesisht në zonën e Novoselës. Në këtë pjesë miveli i lumit Vjosë po fryhet me ritme të frikshmë.
Ndërsa drejtuesi i Bashkisë së Vlorës, Dritan Leli, ka treguar dhe për masat e marra në përballimin e situatës dhe planet e bashkisë për të ndihmuar banorët e zonave.
“Në Novoselë Vjosa rritet me 20 centimetra në orë dhe kjo, sipas banorëve është një rritje e pazakontë. Bëhet fjalë për prurje të reja dhe mendohet që do të jenë më të forta gjatë natës se ato në orët e ditës, që do të vështirësojnë situatën për banorët. Janë evakuuar 7 familje, që janë shpërngulur dhe janë duke u sistemuar, ndërsa pjesa më e madhe janë zhvendosur tek të afërm në zona më të sigurta”- tha Leli.
Ai shtoi se shumë shpejt bashkia do të bëjë përllogaritjet e dëmeve të shkaktuara deri më tani në Vlorë.
