Policia e Elbasanit ka bërë të mundur arrestimin e një të riu, të cilit i është prishur plani nga një qytetar, ku falë këtij të fundit është bërë e mundur që të mos realizohej një grabitje. Sikundër bëjnë me dije burime zyrtare të policisë së Elbasanit, falë ndërhyrjes në kohë është kapur në flagrancë një shtetas, në tentativë për të grabitur me armë dhe maskë një taksi.
Në sajë të reagimit në kohë të policisë, është bërë i mundur arrestimi në flagrancë i shtetasit S.H., 17-vjeç, lindur në Gramsh dhe banues në Elbasan. Arrestimi i këtij shtetasi u bë pasi në Sallën Operative të Komisariatit të Policisë Elbasan, erdhi një telefonatë nga një qytetar, për një tentativë grabitjeje me armë dhe maskë të një automjeti, në dalje të fshatit Kërcyk, Njësia Administrative Tregan.
“Falë reagimit të shpejtë dhe një pune të mirëorganizuar nga ana e shërbimeve të Komisariatit të Policisë Elbasan, u arrit identifikimi dhe kapja në flagrancë e shtetasit S.H, i cili rreth orës 15:30 në vendin e mësipërm, ka tentuar të grabisë me armë shtetasin G.M , 51-vjeç, banues në fshatin Kuqan, i cili ka qenë duke lëvizur me automjetin e tij taksi të markës “Benz Mercedes”.
Nga kontrolli i ushtruar, këtij personi iu gjetën me vete të futura në një çantë sportive me ngjyrë të zezë, një armë zjarri pushkë model 56, 25 fishekë model 56, një maskë me ngjyrë të zezë, një palë doreza, të cilat ky shtetas i përdorte për të realizuar grabitjet”.
Po punohet edhe për dokumentimin ligjor të ngjarjeve të tjera të ndodhura në këtë zonë. Materialet hetimore i kaluan Prokurorisë për veprime të mëtejshme, për veprat penale të “Vjedhja me armë e mbetur në tentativë” dhe “Armëmbajtja pa leje”.
