Juventusi dështoi dje në darkë në Champions për të disatin vit radhazi. Tashmë “Tripleta” për ta nuk është më një ëndërr, por është kthyer në një makth sepse vit pas viti po pasojnë zhgënjimet e njëpasnjëshme në Europë.
Por të paktën kësaj radhe ata nuk e humbën në finale. Dje ata fituan ndaj Realit 1-3, por goli i Realit i dërgoi në shtëpi dhe ishte një gol që erdhi në minutën e 97 pas një penalltie të Ronaldos.
Janë minuta kaotike ato të penalltisë. Janë pikërisht minutat pasi arbitri Oliver ka vendosur që në minutën e 93′ të sfidës të jepte penalltinë kundër Juves.
Në orët e fundit ka dalë në pah një video, i treguar nga “Chiringuito TV“, në të cilin tregohen qartësisht lojtarët e Juventusit që tentojnë të dëmtojnë pikën e bardhë të penalltisë që do të gjuhej nga Cristiano Ronaldo.
Një tentative që dështoi ngaqë u pikas nga Marcelo, Lucas Vazquez dhe Asensio të cilët e vinë re gjestin dinak të lojtarëve të Juventusit dhe protestuan për këtë fakt. Ata e rregulluan vetë pikën e bardhë të penalltisë, përpara gjuajtjes së Cristiano Ronaldos.
Ndërkohë, në videon më poshtë, shikohet edhe Cristiano Ronaldo në ato minuta që ka qenë i përqendruar vetëm tek penalltia pa u shqetësuar nga protestat apo nga gjestet e juventinëve. Për fatin e mirë të madrilenëve, tentativa e juventinave dështoi, dhe penalltia u shndërrua në gol.
