Vetëm pak orë na ndajnë nga dueli më i madh në historinë e UFC-së, mes Khabib Nurmagomedov dhe Conor McGregor, për titullin kampion bote peshën e lehtë të artet marciale mikse. Është rusi ai që mbanë trofeun në duar në këtë moment dhe do ta mbrojë përballë irlandezit i cili kërkon “hakmarrje”. Sfida është e vlefshme për eventin UFC-229, që zhvillohet në stadiumin “T-Mobile Arena” të Las Vegasit.
Kjo përballje është ndër më interesantet që është zhvilluar ndonjëherë, pasi të dy ‘luftëtarët’ janë përballur disa herë me njëri tjetrin në konferenca dhe janë konfliktuar. Ndërsa, disa muaj më parë McGregor ka sulmuar një autobus ku ndodhej Khabib me qëllim për ta sulmuar atë. Tifozët duket se janë në anën e irlandezit dhe nuk e pritën aspak mirë daljen në skenë të kampionit rus, që u dërgoi një mesazh si atyre ashtu dhe rivalit të tij.
“Më vjen keq, por do ta shtyp në kafaz idhullin tuaj, djaloshin tuaj. Unë dua të falënderoj fansat irlandezë anembanë botës, pasi është falë jush që po zhvillohet ky event. Me shpresën e Zotit, unë nesër do të jem sërish fitues”, u shpreh Khabib Nurmagomedov.
