Kremlini paralajmëroi se Rusia do të hakmerret nga SHBA-ve. Rusia do të krijojë raketa të reja “për të rivendosur ekuilibrin” e fuqisë ushtarake nëse SHBA do të tërhiqen nga traktati i armëve. Një trakt ky i nënshkruar në epokën e Luftës së Ftohtë.
Presidenti Donald Trump tha të shtunën se Shtetet e Bashkuara do ta braktisnin traktatin. Ai akuzoi Rusinë për shkeljen e marrëveshjes. Kjo marrëveshje ndalon raketat me bazë në tokë me rreze mesatare.
Reagimi i Moskës
“Kjo do të thotë se Shtetet e Bashkuara nuk po fshihen, por haptazi po fillojnë të zhvillojnë këto sisteme në të ardhmen. Nëse këto sisteme po zhvillohen, atëherë është e nevojshme që të ndërmerren veprime. Këto veprime do merren edhe nga Rusia, për të rivendosur ekuilibrin në këtë sferë”, tha zëdhënësi i qeverisë ruse, Dmitri Peskov, sipas “Reuters”.
Ai ka shtuar se: “Kjo është një çështje e sigurisë strategjike. Masat e tilla mund ta bëjnë botën më të rrezikshme”. Ndërprerja e traktatit të miratuar nga Presidenti Ronald Reagan dhe udhëheqësi sovjetik Mikhail Gorbaçov në vitin 1987, do të rriste mundësinë e përshkallëzimit të garës së armëve. Kjo lëvizje vjen në një kohë kur ushtria e Rusisë është bërë gjithnjë e më agresive në rajon.
Rusia hedh poshtë akuzat
Rusia i ka mohuar pretendimet e SHBA-së se ajo ka shkelur traktatin dhe ka akuzuar Shtetet e Bashkuara për minimin e marrëveshjes. Peskov tha se Moska pret një shpjegim të hollësishëm nga Uashingtoni mbi vendimin e tërheqjes së tij nga traktati. Këshilltari i Sigurimit Kombëtar i Presidentit Trump, John Bolton, pritet të takohet sot me Presidentin rus, Vladimir Putin.
