Zëdhënësi i qeverisë greke, Stelios Petsas, thotë se Greqia ka në plan të blejë armë, të forcojë forcat e saj të armatosura dhe të riorganizojë industrinë e saj të mbrojtjes.
“Ne jemi në bisedime me aleatët për të rritur forcat tona të armatosura”, tha ai për gazetarët.
Ai theksoi se kryeministri Kyriakos Mitsotakis do t’i përshkruajë planet e tij gjatë një fjalimi vjetor të politikës ekonomike të shtunën.
Një zyrtar i qeverisë greke i tha Reuters javën e kaluar se Greqia është në bisedime me Francën dhe vendet e tjera rreth blerjes së avionëve luftarakë. Greqia po përpiqet gjithashtu për më shumë se një dekadë të konsolidojë dhe privatizojë kompanitë e saj të mbrojtjes.
Mitsotakis do të takohet me Presidentin Francez Emmanuel Macron në Korsikë të enjten, përpara një samiti të udhëheqësve të Evropës Jugore në ishullin francez. Të dy udhëheqësit pritet të diskutojnë marrëdhëniet e tensionuara të Bashkimit Evropian me Turqinë, tha zyra e Macron.
Kjo lëvizje e radhës e Greqisë duket se do të tensionojë edhe më shumë marrëdhëniet me Turqinë.
