Presidenti i Rusisë, Vladimir Putin, ka deklaruar se ende nuk është parë ndonjë sinjal që SHBA është duke u tërhequr nga Siria, raporton Anadolu Agency (AA).
Presidenti rus këto komente i ka bërë gjatë konferencës së tij vjetore për media, ku u shpreh se pajtohet me komentet e presidentit amerikan Donald Trump se është arritur fitore kundër DEASH-it.
Putin gjithashtu ka deklaruar se situata aktuale, e karakterizuar nga rritja e tensioneve ushtarake, mund të çojë në një luftë bërthamore që do të shkatërrojë planetin dhe se bota snënvlerëson rëndësinë e zhvillimeve të mundshme të ngjarjeve aktuale.
“Tërheqja e SHBA-ve nga Trakti Anti-Ballistik i Raketave dhe synimi i saj për t’i dhënë fund Traktat të Forcave Bërthamore me Rreze të Mesme (INF) të cilat janë shtyllat e sistemit ndërkombëtar të kontrollit të armëve, zvogëlojnë pragun e aplikimit të armëve bërthamore dhe nga ana tjetër mund të çojë në një katastrofë globale bërthamore”, deklaroi Putin.
Putin tha se shpreson që njerëzimi të ketë një ndjesi të përbashkët për të mos “lëvizur drejt këtij skaji”.
Kjo është konferenca e parë masive për media e presidentit rus, ku ai ka vlerësuar ngjarjet kryesore të vitit 2018, pasi ai u rizgjodh për mandatin e katërt. Rreth dy mijë gazetarë janë mbledhur në Moskë për të ndjekur konferencën vjetore për media të presidentit Putin.
