Protesta që ka bërë bashkë pedagogët dhe studentët e UBT-së është përshkallëzuar me tensione kundrejt nënkryetarit të Bashkisë së Tiranës. Projekti për ndërtimin e një shkolle 9-vjeçare në fidanishten e këtij universiteti ka çuar në një konflikt të hapur.
Arbër Mazniku gjatë prononcimit për mediat është ndërprerë menjëherë nga pedagogu i vreshtarisë Lush Susaj, i cili e akuzoi drejtpërdrejt atë se po shkatërron universitetin si edhe i tha që është penduar që ka votuar Partinë Socialiste.
“70 breza kemi nxjerr këtu. Jam vetë pronar tokash, që ma ka zënë HEC dhe nuk pretendoj kurrë me shkul hidrocentralin. Kam qenë student e jam pedagog në këtë universitet. Kjo është qendër didaktike, bënim praktika e teori. Nëse hiqet kjo, është hequr universiteti. Ja ku keni vend për të ndërtuar 10 shkolla sipër veterinarisë. Ju po prekni dhe keni shkatërruar universitetin dhe unë nuk flas për interesat e mia. Unë mbroj interesin e studentëve, të kishit ardhur për bisedime me ne. Na ndihmoni të ndërtojmë universitetin dhe jo ta shkatërrojmë. Ne kemi duartrokitur masterplanin e kryeministrit. Ju kam votuar, ma thaftë Zoti dorën! Po të dëgjoj për respekt si nënkryetar bashkie, ndryshe s’të dëgjoj asnjë sekondë”, u shpreh i revoltuar pedagogu.
‘Ashtu si universiteti ka nevojë për hapësira edhe banorët e kësaj zonë kanë nevojë për hapësira’, u shpreh i bindur nënkryetari i Bashkisë Arbër Mazniku. Sipas tij, ndërtimi i shkollës 9-vjeçare do i shërbejë fëmijëve të zonës përreth ku edhe do të ketë bashkëpunim me universitetin.
