Në një intervistë për AA, zëdhënësi i Pentagonit Eric Pahon ka deklaruar se në Bazën Ajrore Luke në Arizona, është transferuar një nga dy avionët F-35. “Një avion tjetër do të dërgohet nesër”, u shpreh ai. Nga departamenti amerikan i Mbrojtjes (Pentagon) bëhet e ditur se avionët janë të dedikuar për Turqinë, por ende nuk është vendosur se çfarë ndryshimi do të bëhet lidhur me trajnimin e pilotëve turq në bazën e Arizonës. Pahon theksoi se “trajnimet do të vazhdojnë” në të njëjtën linjë.
Dy F-35 të cilat i janë dorëzuar Turqisë gjenden aktualisht në Bazën Ajrore Luke në Arizona, ku pilotët janë duke u trajnuar. Avionët janë caktuar të transferohen në Turqi në muajin nëntor.
Turqia u bë pjesë e Programit të Përbashkët Luftarak F-35 në vitin 2002 dhe ka investuar më shumë se 1,25 miliardë dollarë. Ajo gjithashtu prodhon pjesë të ndryshme të avionëve për të gjitha variantet e F-35 dhe konsumatorët, raporton balkanweb.
Mësohet se ky vendim i Turqisë për të blerë sistemin rus S-400 ka shkaktuar tensione me Washingtonin, i cili ka marrë një vendim të menjëhershëm duke pezulluar ofrimin e pjesëve dhe shërbimeve të nevojshme për Turqinë për pranimin e avionëve luftarakë F-35. Ndërkohë ministri i Jashtëm turk Mevlüt Çavuşoğlu tha dje se sistemi do të shërbejë vetëm për përdorim të Turqisë, duke iu përgjigjur në këtë mënyrë SHBA-së e cila u shpreh kundër këtij vendimi.
“Nuk duhet të integrohet në sistemin e NATO-s dhe ky nuk është qëllimi ynë. Është për përdorim vetjak. Ky sistem nuk do të konsiderojë si armik asnjë sistem të NATO-s, përfshirë avionin F-35”, sqaroi kryediplomati turk.
Reagimi negativ i zyrtarëve amerikanë vjen me argumentin se Turqia duhet të blejë sistemin raketor amerikan Patriot në vend të sistemit rus S-400, pasi sipas tyre nuk përputhet me sistemet e NATO-s dhe ekspozon avionin F-35 ndaj mashtrimeve të mundshme ruse duke përfshirë përpjekjet e fshehta për të marrë informacione kritike mbi avionin, që më pas mund të dërgohen në Rusi.
