Temperatura te fëmijët nuk do të thotë gjithnjë se fëmijë juaj është sëmurë. Megjithatë, temperatura përgjithësisht është një shenjë e një sëmundjeje.
Por, përgjithësisht gabimi që bëjnë nënat është të dalit në konkluzione pa qenë të sigurt. Kështu, shumë prej tyre u japin fëmijëve shurup pasi mendojnë se ai ka temperaturë vetëm duke i prekur ballin ose duart.
Pra, është me rëndësi që gjithmonë t’i masni me termometër temperaturën fëmijës suaj dhe më pas të merrni masa për të. Një tjetër gabim është dushi me ujë të ftohtë.
Si zbritet temperatura?
Temperatura duhet ulur te të vegjlit nëse i kalon 38,5° dhe fëmija ndien një lloj këputje në të gjithë trupin. Ilaçi i parë është paracetamoli që ekziston në shumë mënyra si suposto, pika, bustina apo shurupi. Ai këshillohet të merret çdo 4-6 orë në varësi të peshës trupore të fëmijës, ndërsa ibuprofeni duhet dhënë çdo 6-8 orë.
Zakonisht ilaçi e ul temperaturën pas një ore dhe efikasiteti i tij konsiston në 4-5 orë, dhe jo gjithmonë e çon temperaturën në vlera normale. Nëse është pak efikas, doza, sipas këshillave të pediatrit mund të rritet ose t’i jepet fëmijës në intervale kohore më të shkurtra (për shembull pas vetëm 4 orësh). Nëse pas dy ose tri dozash antipiretikësh temperatura nuk ulet, fëmija duhet çuar menjëherë te pediatri ose në urgjencë. Banjat me ujë të ftohtë nuk këshillohen fare, ndërsa kompresat e ftohta po.
Sipas mjekëve, termometri nuk duhet vënë kurrë nëse fëmija nuk është i qetë dhe ka qarë për një kohë të gjatë. Po ashtu as në ambiente shumë të ngrohta apo nëse fëmija është mbuluar shumë. Ambienti ku një fëmijë me temperaturë duhet të qëndrojë duhet të jetë i ajrosur mirë.
Gjithashtu, fëmija nuk duhet mbuluar më shumë sesa ai kërkon.
