Mediat televizive në vend i kanë dërguar një letër Autoritetit të Mediave Audiovizive, ku i kërkojnë që të respektojë vendimin për fikjen e sinjalit analog. Ata paralajmërojnë se nëse nuk zbatohet ky vendim, do të dërgojnë çështjen në gjyq.
Tv Klan, Klan Plus, ABC News dhe Shijak TV nuk e kanë fikur sinjalin analog, ndërsa në letrën e televizioneve thuhet se kanë shkelur vendimin e AMA-s. Sipas mediave që kanë përcjellë letrën në fjalë, ky transmetim po bëhet në kundërshtim me vendimin e AMA-s, për më tepër, ka krijuar pabarazi dhe deformim të konkurrencës në treg.
Mediat kërkojnë nga strukturat e AMA-s që të ndërmarrin masat e duhura operacionale dhe ligjore, për të detyruar këta operatorë të zbatojnë ligjin, dhe të mos prishin ekuilibrat e tregut kaq sensibël si ai i mediave.
Letra e plotë:
E nderuar Autoriteti i Mediave Audiovizive (sa vijon edhe vetëm “AMA”), ju drejtohemi me këtë ankesë që ka karakter urgjent, për sa më poshtë vijon.
Në mbështetje të Ligjit nr. 97/2013 “Per Mediat Audiovizive në Republikën e Shqipërisë”, (i ndryshuar) dhe vendimeve te miratuara nga institucioni juaj për mbylljen e transmetimeve analoge dhe kalimin në transmetim digjital, po ju parashtrojmë ankesën për sa më poshtë vijon:
Sipas Vendimit të miratuar së fundmi nga ana e Institucionit tuaj me nr. 119, datë 30.09.2019 për “Mbylljen e transmetimeve analoge në qarqet Tiranë dhe Durrës, në datën 01 tetor 2019’’ (publikuar në faqen web të AMA-s, dhe që i bashkëlidhur kësaj ankese), nga ana jonë si OSHMA është proceduar me mbylljen e transmetimit analog dhe fillimin e transmetimit digjital në respekt të këtij vendimi dhe Ligjit ”Per Mediat Audiovizive në Republikën ë Shqipërisë”.
Konstatohet me shqetësim, ashtu edhe si ju jeni në dijeni nga mbikëqyrja e OSHMA – ve në treg, se operatorë te tjerë si Klan, Klan Plus, ABC Neës, Shjiak Tv etj. nuk e kanë respektuar këtë vendim dhe vazhdojnë të transmetojnë përveç në digjitale edhe në sinjal analog në qarqet Tiranë dhe Durrës. Ky transmetim po bëhet në kundërshtim me vendimin tuaj dhe, për më tepër, ka krijuar pabarazi dhe deformim të konkurrencës në treg.
Sjellim në vëmendjen tuaj që shkelje të tilla sanksionohen nga nenet 18, 19, 78, 88, 132, 133 të Ligjit nr. 97/2013 “Për Mediat Audiovizive në Republikën ë Shqipërisë” dhe, sipas të drejtave dhe rëndësisë së zgjatjes së kësaj situate, mund të jenë objekt i mosmarrëveshjeve që do të lindin dhe shqyrtohen nga organet gjyqësore kompetente për shpërblimet e dëmeve të shkaktuara.
Nisur nga sa më lart kërkojmë nga strukturat e AMA-s që të ndërmarrin masat e duhura operacionale dhe ligjore, për të detyruar këta operatore të zbatojnë ligjin dhe të mos prishin ekuilibrat e tregut kaq sensibël si ai i mediave, duke mos u bërë palë me shkaktuesit e shkeljeve më sipër cituar.
