Google, kompania që ka ndërtuar gjithçka, nga një motor kërkimi deri në një makinë vetëlëvizëse, tani do të provojë të ndërtojë edhe një lagje qyteti.
Sidewalk Labs, kompani urbane në pronësi të Google, është duke planifikuar projektimin e një lagje në Toronto duke pasur si model jetën urbane të shekullit 21.
Sidewalk Labs do të investojë 50 milionë dollarë në fazën fillestare të planifikimit. Kompania gjithashtu ka premtuar të zhvendosë selinë e Google në Kanada në lagjen e re, të quajtur Quayside. Google ka afërsisht 1,000 punonjës në Kanada.
Sidewalk Labs po planifikon të përmirësojë gjithçka, nga reduktimi i ndotjes, zvogëlimi i ndikimit të erës, rritjen e hijeve në ditët me diell dhe bllokimin e shiut për shkak të dizajnit të zgjuar të ndërtesave dhe mbjelljes së pemëve.
Në këtë propozim ambicioz, Sidewalk Labs premtoi ta transformojë motin në funksion të njerëzve. Ai gjithashtu beson se mund të zvogëlojë emetimet e gazrave serë me 73%, konsumin e ujit të pijshëm me 65% dhe prodhimin e mbeturinave me 90%.
Në transport prioritet do të ketë ecja, çiklizmi dhe automjetet elektrike.
“Kjo nuk është një veprimtari rastësore”, tha kryetari Eric Schmidt në një konferencë shtypi të martën. “Ky është kulmi i 10 viteve punë dhe mendime se si teknologjia mund të përmirësojë cilësinë e jetesës së njerëzve”.
Udhëheqësit e Google dhe qeveria kanadeze thanë të martën se shpresojnë se modeli do të shtrihet përtej Torontos në të gjithë botën. (TIRANA TODAY)
