Mauro Icardi nuk është duke kaluar një formë të mirë tek Interi, pasi po kalon një dëmtim i cili e ka lënë jashtë fushave për disa javë. Por çështja më e madhe për diskutim është e ardhmja e bomberit argjentinas, të cilit Interi kërkon ti rinovojë kontratën dhe të vendos një klauzolë më të lartë.
Përfaqësuesit e Interit dhe menaxherja (njëkohësisht edhe bashkëshortja) e Mauro Icardit, Wanda Nara, pritet të ulen shumë shpejt për të nisur diskutimet për rinovimin e kontratës. Marrëdhëniet mes palëve janë shumë të mirë, por në tavolinë është një shumë e madhe parash dhe raportet mund të ndryshojnë. Wanda Nara e ka pranuar se për klientin e saj kanë ardhur dy oferta të rëndësishme. Emrat e skuadrave më të interesuara nuk janë zyrtarizuar, por mësohet se bëhet fjalë për Realin e Madridit dhe PSG. E pyetur për çështjen e rinovimit Wanda Nara shpjegoi:
“Nuk jam takuar me Ausilion, por flasim shpesh në telefon. Unë e di çfarë mendon shoqëria dhe ai e di mendimin tim. Kohët e fundit janë afruar disa skuadra dhe unë kam për detyrë të paktën t’i dëgjoj. Nuk flas me emra.”
Siç është shpjeguar më lart, bëhet fjalë për Realin dhe PSG-në. Bësnikëria ndaj fanellës nuk mund të jetë e përjetshme kur në mes futen paratë dhe kjo kuptohet edhe nga fjalët e Naras.
“Unë punoj për interesat e Mauros, ndërsa Piero Ausilio për ato të Interit. Në fund shoqëria dhe Icardi do të bëjnë zgjedhjen më të mirë për të dyja palët.”
