Marjus Djerri 22 vjeç nga Shijaku dhe Admir Bokrina 31 vjeç nga Shkodra, janë dy të rinjtë shqiptarë që u ndanë para kohe nga jeta. Ata udhëtonin së bashku me makinë për të shkuar në qytetin Rapallo, ku punonin në një kompani pastrimi. Shembja e urës u preu atyre udhëtimin. Dy shqiptarët u nxorën të pajetë nga rrënojat.
Në rrjetet sociale, miq e të afërm kanë shprehur ngushëllimet për dy të rinjtë shqiptarë. Binte në sy veprimi prekës i së ëmës së Marjusit, e cila publikoi një foto duke puthur të birin.
Edhe të afërm të Admir Bokrinës nuk mund ta besonin se 31-vjeçari ishte ndarë nga jeta. Djali i tij i xhaxhait që jeton gjithashtu në Itali, ka publikuar një foto me të. “Është kushëriri im, por praktikisht ishte vëllai im”, thotë ai në një prej komenteve.
Nga shembja e urës në Xhenova deri tani janë konfirmuar 37 të vdekur. Ngjarja e rëndë ndodhi ditën e djeshme, ndërsa ekipet e emergjencës po kërkojnë për të gjetur persona të tjerë nën rrënoja.
