Presidenti Ilir Meta bën përgjegjës për situatën në të cilën ndodhet vendi kryeministrin Edi Rma dhe kreun e demokratëve, Lulzim Basha.
I ftuar në emisionin “Opinion”, kreu i shtetit deklaroi se përpara të merrte vendimin për zhdekretimin e datës së zgjedhjeve, bëri çmos që palët politike të uleshin në një tryezë. Por, sipas tij ulja në tryezë u pengua nga Rama dhe Basha.
“Unë i kam thirrur partitë politike në mënyrë të vazhdueshme, pengesa kryesore për të zhvilluar një tryezë të përbashkët, është e qartë kush ka qenë pengesa. Ka qenë insistimi i Kryeministrit Rama për të mos ndryshuar datën 30 qershor, për të mos i dhënë një mundësi opozitës për të shtyrë datën. Dhe insistimi i zotit Basha për të mos u ulur në një tavolinë me zotin Rama si kryeministër”, tha Meta.
Po ashtu, presidenti foli dhe për djegien e mandateve nga ana e opozitës, ndërsa e konsideroi “të nxitur” veprimin e Ramës në zëvendësimin e deputetëve.
“Ai ka nxituar, zëvendësimi i këtyre deputetëve është kryer në një mënyrë të paligjshme sipas legjislacionit tonë. Nëse ai do kishte dëshirë dhe nëse ai mendonte se unë kisha ndikim tek opozita ai të priste sa unë të kthehesha nga Gjermania”, theksoi kreu i shtetit.
