Fillimisht humbën Neymar dhe tani i refuzon Griezmann, drejtuesit e Barcelonës janë treguar vërtetë të paaftë me këta dy lojtarë. Kjo nuk lidhet thjeshtë me faktin që nuk arritën ti bindin që të jenë pjesë e Barçës, por pasi ata janë të fundit që i marrin vesh vendimet e lojtarëve, vetëm kur dalin në komunikatë zyrtare. Çështja e Griezmann u kthye në një “telenovelë” të gjatë, ku në fund Barcelona doli e humbur. Edhe në këtë rast drejtuesit e Barcelonës dolën si të paaftë për të mbyllur një marrëveshje, ashtu siç ndodhi në largimin e Neymar.
Në këtë mesele u përfshi edhe mbrojtësi Pique, i cili ishte në dijeni të vendimit të francezit. Vendimin e tij Griezman e bëri publik nëpërmjet një dokumentari me kompaninë “Movistar+”, kompani e cila menaxhohet nga vëllai i Gerard Pique, Marc Pique.
Mbrojtësi spanjoll kishte reaguar para vendimit të Griezmann me një postim në Twitter, ku shkruante “Për t’u parë sonte” dhe e kishte shoqëruar me ikonën e kokoshkave. Edhe Samuel Umtiti reagoi për postimin e spanjollit duke thënë : “Unë nuk kam kokoshka”, duke e kthyer në lojë dokumentarin e Griezmann, pavarësisht se klubi ku ata të dy luajnë ishte i përfshirë në këtë mes.
Kjo ka lënë shije të keqe te Barcelona, të cilët nuk ishin në dijeni të vendimit, ndërsa një pjesë e madhe e lojtarëve ishin në dijeni të vendimit të Griezmann. Ashtu si në rastin e Griezmann, edhe Neymar u kishte treguar shokëve të tij se do të largohej për te PSG, këtë e kishte bërë në dasmën e Messit, ndërsa drejtuesit e Barcelonas nuk dinin asgjë. Në Spanjë janë në pritje të reagimit të klubit katalanas, dhe mendohet se do të ketë penalizime në lidhje me qëndrimin e lojtarëve.
