Të mbledhësh krom në oborrin e shtëpisë është diçka normale, pasi edukon fëmijën me kulturën e punës, shprehet drejtorja e shkollës 9-vjeçare “Xhevdet Doda”, Lindita Kaja. Ajo siguron se ky aktivitet kryhet gjatë ditëve të pushimit, ose pas orarit të mësimit.
Të gjithë mbijetojnë me anë të kromit në Bulqizë. Dikush është minator në minierë, një tjetër e kërkon metalin e çmuar në stoqet e nxjerra nga fundi i tokës, ku mes tyre ka edhe shumë fëmijë. E ky realitet është i pranuar nga të gjithë në Bulqizë.
“Sa herë ndryshon konjuktura e kromit, normalisht që këto raste edhe shtohen. Nuk është fenomen i përhapur, por në raste sporadoke ka dhe vazhdon të ketë. Ne kemi diskutuar dhe me këta blerësit, por në shumicën e rasteve fëmijët e shesin kromin nëpërmjet një personi më të rritur”, thotë kryetari i Bashkisë së Bulqizës, Melaim Damzi.
Opozita shpeshherë ka akuzuar Shërbimin Social se po kërcënon familjet me ndërprerje të ndihmës ekonomike në rast se ata nxjerrin fëmijët për të mbledhur krom, akuzë kjo që hidhet poshtë nga ata.
“Për ndryshimin totalisht të situatës duhet një mirëfunksionim i të gjitha instancave”, thotë drejtori i Shërbimit Social në Bulqizë Haxhi Pulja për TCH.
Madje edhe Zyra e Punësimit kërkon angazhim nga të gjitha strukturat “Kemi kërkuar ngritjen e një task-force gjatë takimeve me prefektin për të ndaluar këtë fenomen”, shprehet Asllan Daxha, drejtor i Zyrës së Punësimit në Bulqizë.
Por pavarësisht apeleve zyrtare kërkimi i kromit mes grumbujve të gurëve vijon sërish vijon.
Një ditë më parë në këtë qytet, që fle i varfër mbi një nëntokë të pasur ndodhi fatkeqësia e radhës. Një 23-vjeçar, Eduart Dama, humbi jetën i zënë poshtë nga një pirg minerali.
Lidhur me këtë ngjarje , prokuroria po heton për shkaqet. Nga qershori i vitit 2008 e deri më sot, në Qarkun e Dibrës janë regjistruar 172 aksidente në miniera, ku kanë humbur jetën 16 persona. Në pjesën dërrmuese të rasteve, aksidentet kanë ndodhur për shkak të mungesës së sigurisë në punë.
Edhe pse është një nga qytetet me nëntokën më të pasur në Shqipëri, Bulqiza shumë pak përfiton prej kromit. Metali i çmuar ngarkohet e largohet nga ky qytet. Këtu mbeten grumbuj gurësh, që çdo ditë gërmohen nga fëmijë, burra, gra e të moshuar, të cilët nxjerrin prej aty, atë sasi të vogël të kromit, i cili u shërben për të fituar bukën e gojës.
Pavarësisht rreziqeve të mëdha, të cilat në jo pak raste kanë shkaktuar dhe tragjedi, pesha e urisë është më e madhe se pesha e një kove të mbushur me krom.
