Ditën e hënë do të mbahet provimi i parë i Maturës Shtetërore, ai i gjuhës së huaj.
32 mijë maturantë do t’i nënshtrohen këtij testi, i cili ndryshe nga herët e tjera do të jetë vetëm me pyetje me alternativa.
Drejtoresha e Qendrës së Shërbimeve Arsimore, Rezana Vrapi sqaron se provimi do të përmbajë 60 pyetje të tilla.
“Nuk ndryshon numri i pikëve, por ndryshon lloji i pyetjeve. Në këtë maturë i gjithë teksti do të jetë me pyetje me alternativa. Janë 60 të tilla për 60 pikë. Është shkurtuar koha nga 2:30 në 2 orë. Nuk do të ketë pyetje ese e cila merrte rreth 45 minuta për t’u zgjidhur”, tha ajo për Klan Tv.
Korrigjimi i testeve do të bëhet në mënyrë elektronike për të mos grumbulluar më shumë mësues, në kuadër të masave për distancimin fizik për shkak të koronavirusit.
“Por këtë vit për shkak të pandemisë dhe kushteve ku ndodhemi, që të mos mbledhim korrigjues, të cilët janë të detyruar që kur vlerësojnë një pyetje të hapur të komunikojnë me njëri-tjetrin për pikën finale të maturantit, është kaluar në këtë variant. Gjithçka do korrigjohet në mënyrë elektronike, duke shmangur korrigjimin njerëzor”, shtoi ajo.
Kujtojmë se çdo klasë do të ketë maksimumi 15 nxënës që do të mbikëqyren nga një koordinator.
