Drejtori i Politikave Fiskale në Ministrinë e Financave, Niko Lera, ka sqaruar projektligjin e propozuar nga Rama për lojërat e fatit. I ftuar në emisionin “Kjo Javë”, ai tha se nga 1 Janari i vitit të ardhshëm, asnjë qepen lokali që ka në të baste sportive apo kazino, nuk do të ngrihet.
“Do të mbeten në tregun e lojërave të fatit, me dy ndryshime që janë deklaruar deri tani, Lotaria Kombëtare, Bingo Televizive dhe lojërat elektronike.
Në struktura akomoduese të licencuara me 5 yje që kanë kazino, apo në resorte turistike. Sepse ka mundësi kontrolli të plotë”.
Ai u ndal edhe tek shqetësimi i qytetarëve, teksa nënvizoi se asnjë nuk do të mbetet pa punë.
“Një pjesë e madhe e tyre nuk janë ekskluzivisht pika bastesh, por janë edhe ‘bar bufe’. Ku ka një vend të veçantë ku vendosen baste. Ne në të gjithë tregun e lojërave të fatit kemi 7280 të punësuar.
Një pjesë e tyre do të vazhdojnë të jenë të punësuar, sepse janë punësuar në Lotarinë Kombëtare, në bingon televizive etj. Kemi llogaritur me logjikën e të ardhurave që 65-70 % e këtij numri i përket kësaj kategorie të lojërave të fatit që nuk do të jetë më në treg.
Nuk do të mbetet asnjë njeri pa punë. Sepse, janë 4200 pika bastesh. Por njëkohësisht janë edhe bar bufe. Ai është i licencuar si bar bufe, pra nxjerr të ardhura. Pra në 4200 pika, pjesa kryesore kanë aktivitet kryesore lokalin, por edhe ato që janë thjesht pika bastesh, do të ristrukturohen”.
