Në orën 18:00 do të startojë edhe sezoni i ri i Serie A, i cili këtë vit është në një nivel tjetër duke parë merkaton e mirë që kanë bërë skuadrat. Por ajo që po pritet me shumë interes është debutimi i Cristiano Ronaldos në kampionatin italian, pasi iu bashkua Juventusit, duke ‘braktisur’ Real Madris pas 9 vitesh. Na ndajnë vetëm pak orë nga debutimi i fituesit të “Topit të Artë” të vitit 2017 që ta shohim në fushë dhe do të jetë pikërisht në ndeshjen Chievo-Juventus.
“Gazzetta dello Sport” raporton se qyteti i Veronas është i blinduar për këtë ndeshje dhe po shikohet me detaje cdo gjë, madje janë marrë masa edhe kundër terrorizmit. Kjo të bën të kuptosh më qartë se sa i rëndësishëm është Ronaldo për futbollin italian. Përdorimi i dy njësive të Antiterrorizmit, një nga Karabinierët dhe një prej Shtabit të Policisë është konfirmuar, gjithashtu. Jo sepse e dinë nga Prefektura se ka kërcënime apo ndonjë alarm të veçantë, por për të përballuar në mënyrën më të mirë fluksin e madh të njerëzve në zonën e stadiumit “Bentegodi”.
Diferencat mes dy skuadrave janë mjaft të mëdha dhe në 12 ndeshjet e fundit Chievo ka m,arrë vetëm një pikë përballë Juventusit. Por nëse bën një krahasim të thjeshtë mes Ronaldos dhe kundërshtarit të sotëm e kupton mjaft qartë ndryshimin. Ylli portugez fiton rreth 31 milionë euro në sezon, ndërsa i gjithë “malli” i ekipit të D’Anna është 9.5 milionë euro.
Që Ronaldo do të ketë sukses në aventurën e re këtë nuk e diskuton njeri, por dyshimi i vetëm është se në çfarë pozicioni do të luaj, në të majtë lart, apo do të luaj në qendër të sulmit, mbetet për tu parë se cili është vendimi i Allegrit.
Ndërsa në mbrëmje do të jetë një supersfidë tjetër, ajo mes Napolit dhe Lazios. Një supersfidë për rikthimin pas 9 vitesh të Carlo Ancelotit në Serie A.
