Kryeprokurorja e Përgjithshme e Përkohshme Arta Marku ka pezulluar sot nga detyra çiftin e prokuroreve Rovena Gashi dhe Dritan Gina.
“Pezullimi i detyrës për të dy Prokurorët e Përgjithshëm të Tiranës është bërë për shkak të refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Pas zbulimit të bujshëm,rezulton se të paktën 16 prona nuk ishin deklaruar nga Rovena Gashi, ish Nr. 2 i Prokurorisë së Përgjithshme. Ndërsa pak muaj më parë ka përfunduar procedura e verifikimit dhe vlerësimit të tyre në terren. Duke i hapur në këtë mënyrë rrugën nisjes së procedurave për sekuestrimin e këtyre pronave.
Vendimi i marrë ka ardhur pas sigurimit të provave dhe dëshmive të pakundërshtueshme, duke e bërë këtë rast, kazusin e parë për bllokimin e pronave të ish zyrtarëve të lartë të cilat i kanë vendosur ato në mënyrë të kundraligjshme e në sistemin e vjetër të drejtësisë.
Pronat e padeklaruara
Gashit i janë zbuluar si të padeklaruara në procesin e vettingut plot 16 prona të patundshme, një pallat në plazhin e Durrësit, 14 apartamente, dhe dy godina të mëdha biznesi, njeri për fasonet dhe një tjetër për shitje me shumicë e pakicë te materialeve hidrosanitare, në Lagjen 14 në Shkozet.
Vlera e këtyre pronave përllogaritet të jetë mbi 2 milionë euro dhe pritet që ato ti falen familjeve te pastreha të qytetit të Durrësit.
Akuzat ndaj Dritan Ginës
Dritan Gina, ish Kryeprokurori i qarkut të Elbasanit është hetuar nga një proçes i brendshëm adminitrativ në lidhje me një nga skandalet më të mëdha ku mund të jetë përfshirë një prokuror: Për falsifikim dokumentesh nëpërmjet zhdukjes së provave nga dosja e tij personale e deklarimit të pasurisë.
Çfarë ka ndodhur?
Prokurori Dritan Gina është shprehur se se për të mundësuar blerjen e këtij apartamenti në Tiranë ai ka marrë një kredi me vlerë 45 mijë euro. Për të justifikuar diferencën e çmimit të kësaj pasurie që ai ka së bashku me bashkëshorten Rovena Gashi, ka shkruar se ndërkohe 35 mijë euro të tjera ia kanë bërë dhuratë, sipas asaj që ka shkruar me dorën e vet në formularët e dorëzuar pranë Inspektoratit të Lartë të Deklarimit dhe Kontrollit të Pasurive dhe Konfliktit të Interesit.
Dritan Gina ka dhënë gjithashtu se detajet e dhuratës prej 35 mijë eurosh që i janë bërë atij, gjenden në faqen 6 të deklaratës së pasurisë së vitin 2011. Por këtu nis e merr udhë edhe edhe skandali pas shumë e shumë skandalesh të tjerë, që me sa duket nuk po i ndahen familjes së tij. Sepse faqja Nr. 6 (gjashtë) e dosjes së deklarimit të tij të pasurisë për vitin 2011, është zhdukur. Kjo duket të jetë një heqje e qëllimshme e faqes për të zhdukur gjurmët e “dhuratës” bujare prej 35 mijë eurosh ose 50 milionë lekësh që siç pretendon Gina, i janë bërë.
HETIMI
Ajo që të çudit tjetër tek të ardhurat dhe pasuria e çiftit të famshëm Gina- Gashi është edhe fakti se sapo Rovena u bë Drejtoreshë e Marrëdhënieve Juridiksionale me Jashtë në Prokurorinë e Përgjithshme nga Adriatik Llalla nuk i dhuruan vetëm këto 35 mijë euro, por edhe një shtëpi në Tiranë.
Të gjitha këto marrëdhënie të çuditshme pasurimi të menjëhershëm dhe dhurata prej mbi 100 mijë eurosh po kalojnë tashmë në sitën e specialistëve të Komisionit të Pavarur të Kualifikimit (KPK) ose shkalla e parë e vettingut për prokurorët dhe gjyqtarët e sistemit të drejtësisë shqiptare. Pas pak ditësh pritet që të shpallet vendimi për Rovena Gashin fillimisht dhe më pas edhe për Dritan Ginën.
Me gjithë këto skandale pas skandalesh që po zbulohen për znj. Gashi pritet që ajo jo vetëm të përjashtohet nga sistemi i drejtësisë, por edhe të dërgohet për ndjekje penale, si edhe miku i saj më i ngushtë, ish Kryeprokurori Adriatik Llalla.
