Unioni i Gazetarëve Shqiptarë miratoi strategjinë e aktivizimit dhe lëvizjes profesionale dhe organizative në jetën e komunitetit të gazetarëve profesionistë.
Drejtuesit e UGSH-së iu kërkuan krerëve vendorë të organizatës të shumëfishojnë solidaritetin dhe reagimet e tyre unifikuese për rastet e denoncimeve, publikimeve dhe raportimeve që bëhen nga të gjithë për gjendjen e lirisë së medies dhe të gazetarit në vend si dhe për denoncimet në mbrojtje të të drejtave tona.
Gjithashtu, u kërkua që të unifikohen reagimet në nivel qendror dhe strukturat vendore duke përmirësuar gjithë infrastrukturën e publikimeve, komunikimeve dhe debateve e diskutimeve në hapësirën e rrjeteve sociale dhe në faqet zyrtare të organizatës.
Drejtues të degëve të UGSH-së kërkuan që të përmirësohet raportimi periodik për të dhënat dhe raportimet e strukturave që kanë të bëjnë me konfliktet dhe antagonizmat e gazetarëve me punëdhënësit, të ndiqen konfliktet administrative që kanë anëtarët e organizatës, të shihen problemet që paraqiten vazhdimisht me pagat e pa marra të gazetarëve, të raportohen dhe mbahen në dijeni strukturat ligjore dhe ato ndërkombëtare për situatën kritike ekonomike, sociale dhe financiare të gazetarëve si dhe në shërbim të transparencës.
U miratua prej drejtuesve të të gjitha strukturave ideja për një formular periodik mujor ku të pasqyrohen konkretisht dhe zyrtarisht statistikat mujore për numrin e gazetarëve të larguar nga mediat apo të mbetur pa punë si dhe të krijohet një dijeni e saktë rreth ndryshimeve që pëson skena mediatike e vendit në tërësinë e saj.
Drejtuesit e UGSH u kërkuan krerëve vendorë të organizatës të shumëfishojnë solidaritetin dhe reagimet e tyre unifikuese për rastet e denoncimeve, publikimeve dhe raportimeve që bëhen nga të gjithë për gjendjen e lirisë së medias dhe të gazetarit në vend si dhe për denoncimet në mbrojtje e të drejtave tona.
Në takim u vendos që brenda këtij muaji në faqet zyrtare të degëve të UGSH-së si dhe në faqen zyrtare do të publikohet kalendari i veprimtarive dhe lëvizjeve që do të iniciohen respektivisht dhe në kuadër të organizatës kombëtare.
