Pas apelit të 18 të dënuarve në burgun e Burrelit, se do të futeshin në grevë urie, nëse nuk do të plotësoheshin kushtet, vjen edhe reagimi zyrtar nga Avokati i Popullit.
Institucioni i Avokatit të Popullit kërkon mbylljen e burgut të Burrelit. Avokati i Popullit sqaron se ekipi i këtij institucioni, ka arritur të sigurojë dëshminë e këtyre të dënuarve që po refuzojnë ushqimin.
Të dënuarit janë ankuar për kushtet e këqija të jetesës në këtë institucion të vuajtjes së dënimit, të cilat lidhen me infrastrukturën e vjetëruar dhe të amortizuar të këtij burgu.
Po kështu, të dënuarit ngrenë pretendime mbi cilësinë e trajtimit ushqimor që u jepet në këtë institucion. Jo vetëm kaq, por edhe për mungesën e kushteve për zhvillimin e aktiviteteve, për procedurat e transferimit nga burgje të tjera për në burgun e Burrelit, etj. Në reagimin për media citohet fakti se aktualisht drejtuesit e burgut të Burrelit janë në negociata me pjesëmarrësit në grevë, dhe janë informuar mbi protokollin e saj.
“Institucioni i Avokatit të Popullit, sjell në vëmendjen e publikut por edhe të autoriteteve përgjegjëse, se prej të paktën tre vjetësh janë konstatuar kushtet e papërshtatshme të këtij institucioni, e është kërkuar nga ana e institucionit tonë mbyllja e burgut të Burrelit, për shkak të kushteve të tij vërtet të vështira dhe aspak të përshtatshme për kryerjen e funksioneve të veta në mënyrë dinjitoze.
Avokati i Popullit nënvizon se ndonëse në disa prej institucioneve të ekzekutimit të vendimeve penale anembanë Republikës, vërehen përpjekje për përmirësim të infrastrukturës dhe kushteve, zgjidhja tërësore dhe pa asnjë përjashtim e problemit të atyre burgjeve që ende nuk arrijnë të marrin “notë kaluese” për sa u përket kushteve që ofrojnë për qytetarët që kryejnë dënimet në to, mbetet një sfidë për autoritetet tona përgjegjëse”.
