Shpesh në emisionet televizive, të ftuarit refuzojnë pjesëmarrjen në çastin e fundit. Ka nga ata të cilët ngrenë zërin e revoltohen duke prishur linjën e emisionit, e po kështu edhe ironitë janë pjesë e kësaj tabloje.
Kryetari i grupit parlamentar të PS, Taulant Balla, ishte i ftuar mbrëmjen e djeshme në emisionin “Top Show”. Opozita vijon me akuzat e njëpasnjëshme të lidhjes së klasës politike me krimin. Një ndër personat e akuzuar mesë shumti është edhe Balla, i cili nuk i ka shpëtuar këtyre ngacmimeve.
Duke folur për lidhjet e politikës me krimin, veçanërisht në kohën e fushatës elektorale, Balla e mohoi një gjë të tillë duke thënë se populli do ta kishte ndëshkuar.
Kjo deklaratë e Ballës u kundërshtua nga drejtuesi i emisionit, Alban Dudushi, i cili solli si vëmendje rastin e Italisë.
Por ky konstatim i gazetarit u kalua me ironi nga ana e Taulant Ballës, i cili ndërhyri duke i thënë se “ti e ke ndjekur atë, se ke qenë kandidat në Itali dhe e ke parë këtë punë”.
Debati
Dudushi: …kemi përvojën e shtetit përballë Italisë, si ka ndikuar mafia në zona të caktuara.
Balla: Se ti e ke ndjekur atë, se ke qenë kandidat në Itali, dhe e ke parë këtë punë.
Dudushi: Lëri këto, pa ironi kjo, po mafia ndikon patjetër në elektorat.
