Talenti i Genk-ut në Belgjikë, Edon Zhegrova ka bërë mjaft zhurmë sa i përket zgjedhjes së kujt përfaqësueseje do ti bashkohej. Fillimisht kosovari vendosi që do të luante për kombëtaren shqiptare, por në fund gjithçka ndryshoi dhe ai u bashkua me Kosovën.
Ky veprim i të riu duket se mërziti shumë teknikun italian të kuqezinjve, Christian Panuccin, i cili kur u pyet nga gazetarët për Zhegrovën u shfaq mjaft i revoltuar: “Ka disa lojtarë të cilët nuk kanë bythë të zgjedhin atë ekip që dëshirojnë, por atë që u thonë prindërit.”
Por Edon Zhegrova ka shuar çdo keqkuptim përsa i përket zgjedhjes së tij. I grumbulluar nga Dardanët për dy miqësoret ndaj Madagaskarit dhe Burkina Fasos në të cilat pritet të bëjë edhe debutimin e tij me Kosovën, Zhegrova për mediat kosovare theksoi se gjithmonë ka dashur të luajë për Kosovën dhe e ka thënë menjëherë se pjesë e cilës përfaqësueseje dëshiron të jetë.
Futbollisti i talentuar që në fund të marsit do të mbushë 19-vjeç, nënvizoi se asnjëherë nuk ka qenë në mëdyshje për zgjedhjen e tij, ndërsa foli edhe për dy sfidat e rradhës me Kosovën.” Nuk i njoh mirë dy përfaqësueset që kemi përballë dhe nuk e di sesi luajnë, por ne do të jemi të vëmendshëm gjatë kohës dhe unë jam optimist se do të luajmë mirë dhe do të marrim rezultate pozitive”, deklaroi talenti i Genk.
