Talebanët kanë urdhëruar që manekinëve të dyqaneve të rrobave t’u pritet koka. Pronarëve të dyqaneve në provincën perëndimore të Heratit në Afganistan u është thënë të presin kokat e manekineve të tyre, pasi zyrtarët vendosën se ishin “idhuj” mëkatarë.
Adhurimi i idhujve konsiderohet si mëkat në Islam, i cili ndalon adhurimin e dikujt apo sendit tjetër përveç Allahut – që konsiderohet si i vetmi Zot. Vendimi i ashpër u publikua këtë javë nga Ministria për Përhapjen e Virtytit dhe Parandalimin e Veseve në Herat, organi përgjegjës për mbikëqyrjen e interpretimit të rreptë të Islamit nga talebanët.
Ministria fillimisht urdhëroi shitësit që t’i hiqnin plotësisht manekinet, por pronarët e dyqaneve u kundërpërgjigjën dhe thanë se kjo do të shkaktonte humbje të konsiderueshme financiare.
Sipas raporteve lokale, ankesat nxitën Sheik Aziz-u-Rahman, kreun e ministrisë, të urdhëronte që manekinëve t’u pritej koka. Një shënim për shitësit thoshte: “Të gjitha statujat dhe manekinet në dyqanet tuaja duhet të jenë pa kokë”.
Pronari i biznesit Abdul Wadood Faiz Zada i tha gazetës italiane Repubblica: “Çdo manekin kushton 100 dollarë, ose 80 ose 70 dollarë, dhe prerja e kokës së tyre do të jetë një humbje e madhe financiare”.
Mohammad Yusuf shtoi: “Talebanët nuk kanë ndryshuar, do të ketë edhe një herë kufizime. Ata nuk kanë fituar njohje ndërkombëtare, por nëse e fitojnë atë, do të sillnin kufizime edhe më të rrepta”.
Gratë afgane janë përballur me një goditje të egër ndaj lirive dhe arsimimit të tyre që kur talebanët morën pushtetin në fillim të këtij viti.
Gratë dhe vajzat janë paralajmëruar prej kohësh se ato do të jenë viktimat më të mëdha të mundshme të pushtimit të talebanëve. Ligjet brutale, shtypëse dhe seksiste të miratuara nga grupi në vitet ’90, po kthehen në vend.
Burimi i lajmit: New York Post. Pershtatur nga Tirana Today
