Presidenti Meta priti në një takim ambasadorin e ri të BE-së, Luigi Soreca, ku pranoi prej tij letrat kredenciale. Gjatë takimit në fjalë, presidenti shprehu kënaqësinë që Bashkimi Evropian ka përzgjedhur si përfaqësues të tij në vendin tonë një nga njohësit dhe bashkëpunëtorët më të afërt të Shqipërisë dhe rajonit ndër vite, dhe me kontribut të spikatur për suksesin e liberalizimit të vizave me BE.
“Presidenti Meta theksoi se përparimi urgjent në çështjet e shtetit të së drejtës dhe zhvillimit të qëndrueshëm ekonomik, janë domosdoshmëri për vendin, dhe përshpejtojnë agjendën integruese të vendit”.
Kreu i Shtetit nënvizoi rëndësinë e dyfishimit të përpjekjeve të brendshme dhe rritjen e bashkëpunimit pozitë-opozitë, për avancimin e reformave kyçe, që do të mundësojnë realizimin e objektivit për çeljen e negociatave vitin e ardhshëm.
