Presidenti i Republikës së Kosovës, Hashim Thaçi në përfundim të takimit të përbashkët me presidentin e Serbisë, Aleksander Vuçiç dhe zyrtaren e lartë të BE-së, Federica Mogherini, ka thënë se bashkëbisedimi ishte fokusuar në domosdoshmërinë e hapjes së një faze të re të dialogut, që do të çojë drejt një normalizimi të plotë dhe pajtimi mes shteteve dhe popujve tanë.
Presidenti i Kosovës, Hashim Thaçi, tha se periudha e re e bisedimeve do të çonte drejt një normalizimi dhe pajtimi mes të dyja vendeve dhe të dy popujve.
“Kjo fazë e re e dialogut për normalizimin e marrëdhënieve dhe pajtimin mes popujve tanë do të jetë në të mirë të të dy vendeve, në të mirë të popujve tanë, do të mbyll kapitullin e errët të së kaluarës dhe do të hapë një perspektivë të sigurt për të ardhmen evropiane të vendeve tona dhe rajonit. Ndërkohë grupet punuese apo profesionale do të punojnë për hedhjen e ideve preliminare në mënyrë që të jetë një përgatitje e mirë e fillimit të kësaj faze të re të dialogut. Unë shpresoj dhe besoj se normalizimi dhe pajtimi në mes të shqiptarëve dhe serbëve është i mundur dhe do të arrihet“, tha presidenti Thaçi.
Ndërsa Presidenti i Serbisë, Alesksandër Vuçiç, tha se bisedimet e sotme ishin të frytshme dhe në to u shtrua thelbi i përmbajtjes së bisedimeve në të ardhmen.
“Nuk ka dyshim që bisedimet do të vazhdojnë në Bruksel por jo vetëm për tema të caktuara por do të bisedojmë për çështje thelbësore se si i shohim marrëdhëniet tona për një, dy apo pesë vjet. Kjo do të thotë se duhet të bisedojmë më seriozisht dhe më guximshëm. Të bisedojmë ne brenda opinionit serb dhe ata brenda opinionit shqiptar dhe që të gjithë bashkërisht të bisedojmë më shpesh”, tha ai duke theksuar se “çështjet më të rëndësishme po përpiqemi t’i shtyjmë përpara, sesa çështjet teknike“.
