Kryeministri, Edi Rama, dhe kreu i LSI-së, Ilir Meta, nuk kanë arritur të gjejnë gjuhën e përbashkët për të gjetur një zgjidhje për krizën politike, që do të nxirrte edhe kreun e PD-së, Lulzim Basha, nga çadra.
Pas takimit, që zgjati për gati 1 orë e 30 minuta, Meta dhe Rama nuk kanë arritur të gjejnë një formulë, që do t’i çonte të gjitha forcat politike në zgjedhje. Për këtë arsye, ata kanë vendosur t’i drejtohen Partive Popullore Evropiane, ku bën pjesë edhe vetë Partia Demokratike.
‘‘Qëllimi kryesor i këtij takimi ishte përpjekja për të garantuar paprekshmërinë e votës së shqiptarëve si dhe vullneti për të nisur një dialog pa kushte me opozitën. Kemi vendosur që t’i drejtojemi Partisë Popullore Evropiane, ku edhe PD është anëtare që të ndihmojë sa më shpejt të jetë e mundur në këtë dialog në mënyrë që ky ngërç të marrë fund sa më shpejt dhe vendi të shkojë drejt zgjedhjeve të 18 qershorit. Dua të theksoj se PPE ka luajtur një rol të rëndësishëm, në mbështetje të integrimit evropian të Shqipërisë. Shpresoj që sot do ti drejtohemi presidentit Daul dhe komisionerit Hahn, i cili ka qenë i interesuar për të zgjidhur sa më parë krizën politike dhe që procesi i dialogut të nisë sa më parë. Në këto kushte toleranca është e nevojshme’’, u shpreh pas takimit, kreu i LSI-së, Ilir Meta.
